Leikmennirnir sem eru með lausan samning í sumar
Fjölmargir frambærilegir knattspyrnumenn eru með lausan samning í sumar sem þýðir að hvaða lið sem er getur samið við þá án þess að borga krónu fyrir. Breska blaðið Guardian tók listann saman og með fylgir stutt samantekt um hvern og einn.
Einn besti markvörður undanfarinna tuttugu ára, Iker Casillas, verður samningslaus í sumar. Eftir að hafa spilað með Real Madrid í 16 ára gekk þessi 36 ára leikmaður í raðir Porto árið 2015. Hann á hvorki fleiri né færri en 167 landsleiki að baki með landsliði Spánar og enn vel nothæfur.
Portúgalinn Pepe hefur unnið nær alla titla sem í boði eru en undanfarin misseri hefur tækifærum hans í byrjunarliði Real Madrid fækkað. Pepe mun semja við nýtt lið í sumar en spurningin er aðeins hvert hann fer. Hann er 34 ára en býr enn yfir ágætum hraða. Pepe hefur verið orðaður við mörg lið, PSG og Besiktas þar á meðal.
Eftir tæp tuttugu ár í herbúðum Chelsea er komið að leiðarlokum. John Terry, sem er 36 ára, ætlar að halda áfram í boltanum og hefur kappinn verið orðaður við lið í Championship-deildinni, Aston Villa þar á meðal. Á ferli sínum hjá Chelsea hefur Terry tvisvar verið valinn leikmaður ársins, 2001 og 2006 og fjórum sinnum í lið ársins í ensku úrvalsdeildinni.
Franski bakvörðurinn er hokinn af reynslu eftir tíma sinn hjá Arsenal og Manchester City. Hann er enn aðeins 31 árs og ætti því að eiga nokkur góð ár eftir í boltanum. Clichy hefur verið orðaður við nokkur lið, Liverpool er þar á meðal.
Navas er eldfjótur vængmaður sem spilaði nokkra leiki sem bakvörður undir stjórn Pep Guardiola hjá Manchester City í vetur. Þess vegna fær hann stöðu hægri vængbakvarðar í liðinu. Navas er 31 árs gamall Spánverji sem mun finna sér nýtt lið í sumar.
Stuðningsmenn Manchester United muna eflaust eftir Serbanum Zoran Tosic sem fékk afar fá tækifæri undir stjórn Sir Alex Ferguson. Eftir að hann yfirgaf United hefur hann notið meiri velgengni og spilað undanfarin ár með CSKA í Rússlandi. Hann er enn aðeins þrítugur og býr enn yfir miklum hraða. Tosic hefur verið orðaður við lið í Tyrklandi, Galatasaray og Besiktas þar á meðal.
Kirchoff var um tíma talinn einn efnilegasti Þjóðverjinn en ferill hans undanfarin ár hefur ekki alltaf verið dans á rósum vegna meiðsla. Hann lék um tíma með Bayern Munchen en spilaði með fallliði Sunderland á síðustu leiktíð á Englandi. Kirchoff er enn aðeins 26 ára og auk þess að spila á miðjunni getur hann einnig leyst stöðu miðvarðar.
Muntari er reynslumikill leikmaður einn af lykilmönnunum í sterku landsliði Gana. Muntari er 32 ára og þekktur fyrir vinnusemi og góðar tæklingar. Á undanförnum árum hefur hann leikið með liðum á borð við Inter, Udinese og Portsmouth en á síðustu leiktíð spilaði hann með Pescara á Ítalíu.
Ghezzal er 25 ára Alsíringur sem nær allan sinn feril hefur spilað með Lyon í Frakklandi. Hans uppáhaldsstaða er á öðrum hvorum vængnum í þriggja manna framlínu. Ghezzal átti gott tímabil með Lyon tímabilið 2015 til 2016 þegar hann skoraði 10 mörk í 38 leikjum. Þetta er teknískur og fljótur leikmaður sem vakið hefur athygli margra liða. Everton og Milan eru sögð áhugasöm og þá eru forsvarsmenn Roma sagðir líta á Ghezzal sem arftaka Mohamed Salah sem var seldur til Liverpool á dögunum.
Þó að Yiadom, sem er landsliðsmaður Gana, sé enn tiltölulega ungur að árum, eða 24 ára, hefur hann spilað fyrir lið eins og Genoa, Sassuolo, Juventus, Elche, Atalanta og Rauðu stjörnuna í Belgrad svo dæmi séu tekin. Þetta er stór og sterkur framherji sem skoraði 16 mörk í 19 leikjum fyrir Rauðu stjörnuna í vetur. Það er því kannski engin furða að hann sé á listanum.
Það er óþarfi að eyða mörgum orðum í þennan magnaða leikmann sem sýndi og sannaði í vetur að aldur er bara tala á blaði. Zlatan, sem verður 36 ára í haust, varð strax lykilmaður í liði Manchester United og þeirra langmarkahæsti maður í vetur. Slæm meiðsli gerðu það að verkum að hann yfirgefur herbúðir United eftir eins árs dvöl. Zlatan hefur verið orðaður við lið í Bandaríkjunum að undanförnu.