Þessir geta verið svekktir út af því að komast ekki í landsliðið

Höfuðverkur Heimis - Ótrúlega margir góðir leikmenn

Hefur úr mörgum góðum leikmönnum að velja.
Heimir Hallgrímsson Hefur úr mörgum góðum leikmönnum að velja.
Mynd: EPA

Íslenskir knattspyrnumenn hafa aldrei staðið sig jafn vel og síðustu ár, það er staðreynd sem erfitt er að líta fram hjá miðað við stöðu landsliðsins. Íslenska karlalandsliðið átti eins og flestir vita frábæru gengi að fagna á EM í Frakklandi í fyrrasumar, liðið hefur svo byrjað vel í undankeppni fyrir HM í Rússlandi árið 2018.

Ísland vann góðan sigur á Kósóvó á föstudag og er með tíu stig þegar keppni í riðlinum er hálfnuð, liðið á ágæta möguleika á að komast til Rússlands sem væri enn merkilegra afrek en að komast á Evrópumótið sem var fyrsta stórmót liðsins.

Þegar vel gengur vilja allir vera með og í dag á Ísland marga mjög frambærilega knattspyrnumenn. Það eru því nokkrir sem sitja eftir með sárt ennið.

Hér í þessari úttekt verða skoðaðir átta leikmenn sem allir geta verið svekktir út af því að komast ekki í landsliðshóp Heimis Hallgrímssonar. Ekki er verið að gagnrýna störf Heimis með þessum lista heldur aðeins að benda á hversu marga frábæra leikmenn við eigum. Leikmennirnir átta komust ekki í síðasta hóp Heimis sem er nú í verkefni.


Matthías Vilhjálmsson - Rosenborg

Það virðist ekki breyta neinu fyrir Matthías hvað hann gerir innan vallar, hann fær ekki tækifæri með landsliðinu. Mjög fjölhæfur leikmaður sem hefur sýnt góða frammistöðu með Rosenborg í Noregi, hefur hins vegar ekki náð að heilla Heimi Hallgrímsson, þjálfara landsliðsins, og það vekur furðu margra. Þarf að halda áfram á sömu braut og þá er líklegt að kallið komi fyrr en síðar.


Rúnar Már Sigurjónsson - Grasshopper

Það kom gríðarlega á óvart að sjá Rúnar ekki í landsliðshópnum sem nú er í verkefni, hann hefur átt fast sæti í hópnum og var hluti af EM-hópnum. Hefur frá því að EM lauk farið í sterkara lið, en hann leikur í dag með Grasshopper í Sviss. Hefur spilað vel þar og skorað reglulega. Hann má vera hundsvekktur að vera ekki í hópnum.


Rúnar Alex Rúnarsson - Nordsjælland

Okkar langefnilegasti markvörður er byrjaður að spila á fullu í dönsku úrvalsdeildinni, framtíð hans er gríðarlega björt og ljóst má vera að hann er farinn að setja mikla pressu á Heimi Hallgrímsson. Maðurinn sem ætti að standa vaktina í marki Íslands í framtíðinni ef fram fer sem horfir.


Albert Guðmundsson - PSV

Hefur staðið sig virkilega vel í næstefstu deild Hollands og ljóst að ef hann yrði kallaður í íslenska landsliðshópinn þá yrði enn meiri pressa á þjálfara PSV að velja hann í aðallið félagsins. Albert ætti að fá tækifæri með aðalliði PSV á næstu leiktíð og þá ætti möguleiki hans á að komast í landsliðið að aukast mikið. Er efnilegasti leikmaður Íslands í dag.


Hjörtur Hermansson - Bröndby

Við erum með marga öfluga miðverði en Hjörtur hefur stigið mikið upp síðustu mánuði og er miklu betri leikmaður í dag en hann var í fyrrasumar þegar hann fór með landsliðinu á EM. Hjörtur hefur spilað mjög vel í Danmörku og frammistaða hans hefur vakið athygli.


Jón Guðni Fjóluson - IFK Norrköping

Jón hefur stimplað sig inn sem algjör lykilmaður í einu besta liði Svíþjóðar og Heimir Hallgrímsson hefur haft orð á því að Jón sé ansi nálægt því að komast í landsliðshópinn. Stóð sig vel í verkefnum landsliðsins í upphafi árs og ætti með sama áframhaldi að banka enn fastar á dyrnar. Sterkur, með fínan hraða og góðar sendingar.


Guðlaugur Victor Pálsson - Esbjerg

Miðað við hversu fáa miðjumenn við eigum í dag sem eru að gera góða hluti þá ætti Guðlaugur Victor að vera svekktur yfir að fá ekki tækifæri í hópnum. Miðjumaðurinn hefur spilað vel með Esbjerg í dönsku úrvalsdeildinni og sýnt góða frammistöðu í liði sem á í vandræðum.


Björn Daníel Sverrisson - AGF

Björn Daníel sýndi í verkefni landsliðsins í Kína í upphafi árs að snilli hans getur verið mikil. Leikmaður með ótrúlega hæfileika sem getur unnið leiki, gæti mögulega verið leikmaðurinn sem leysir Gylfa Þór Sigurðsson af hólmi að einhverju leyti. Vitað er að skarð Gylfa verðurm aldrei fyllt að fullu missi hann úr leiki, en Björn Daníel hefur að mörgu leyti svipaða eiginleika og Gylfi.

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.