Er falinn karakter í tölvuleiknum og vissi ekki af því
Diego Armando Maradona, einn besti knattspyrnumaður sögunnar er allt annað en sáttur með japanska tölvuleikjaframleiðandann Konami. Maradona uppgötvaði nefnilega nýlega að hann er falinn karakter í fótboltaleiknum vinsæla Pro Evolution Soccer 2017 (PES2017). Svo virðist sem Konami hafi komið goðsögninni þar fyrir að honum forspurðum.
Maradona er reyndar besti leikmaðurinn í leiknum, með 97 af mögulegum 100 í getu á meðan Lionel Messi er með 94.
„Ég frétti í gær að japanska fyrirtækið Konami væri að nota ímynd mína í PES 2017. Því miður mun lögmaður minn Matias Morla þurfa að bregðast við þessu með því að grípa til lögsóknar. Ég vona að þetta sé ekki enn einn svindlið,“ skrifar Mardona á Facebook-síðu sína.
Konami hefur áður notað eftirlíkingu af Maradona í leikjum sínum, þar sem hann kallast Malgani, en engum dylst þegar hann er skoðaður nánar að þar fer eftirlíking af goðsögninni. Leyfi fyrir notkun á liðsnöfnum og leikmönnum hafa lengi plagað PES-leikina og þessar eftirlíkingar oft verið á gráu svæði. En í 2017 útgáfunni, sem kom út fyrir áramót, virðist Konami hafa gengið of langt. Maradona er þar falinn karakter sem verður aðgengilegur eftir tiltekið afrek, eða hugsanlega greiðslu. Það er Maradona ekki sáttur með.