Ljósi varpað á veikleika liðanna sem berjast á toppnum á Englandi
Eftir því sem liðið hefur á tímabilið í ensku úrvalsdeildinni hafa styrkleikar og veikleikar toppliðanna í ensku úrvalsdeildinni komið æ betur í ljós. Tólf umferðir eru eftir af tímabilinu á Englandi og eru flest ef ekki öll félög deildarinnar farin að huga að leikmannamálum fyrir næsta tímabil. DV rýndi í stöðu mála hjá sex efstu liðum deildarinnar og lagði mat á hvaða stöður viðkomandi lið þurfa að styrkja og hvaða leikmenn gætu hentað liðunum.
Gæti keypt: Framherja
Gæti einnig skoðað: Markmann og miðjumann
Möguleg skotmörk: Alvaro Morata, Moussa Dembele
Það er erfitt að benda á veikleika í liði Chelsea enda hefur liðið borið höfuð og herðar yfir önnur lið á tímabilinu. Ef einhver staða á vellinum veldur Antonio Conte, stjóra Chelsea, hugarangri er það staða fremsta manns. Diego Costa hefur skorað 16 mörk á tímabilinu en hann er í raun eini eiginlegi framherji liðsins. Ef hann meiðist gæti Chelsea lent í vandræðum. Hinn ungi Michy Batshuayi hefur ekki staðið undir væntingum og virðist ekki tilbúinn í enska boltann. Moussa Dembele, framherji Celtic, og Alvaro Morata, framherji Real Madrid, hafa verið orðaðir við Chelsea að undanförnu og þá hefur verið orðrómur á kreiki um að Thibaut Courtois hafi áhuga á að snúa aftur til Spánar. Í vikunni var því haldið fram í enskum fjölmiðlum að Chelsea og Real Madrid gætu skipst á þessum leikmönnum í sumar. Þá gæti Conte haft áhuga á að efla miðjuna enn frekar, ekki síst ef Cesc Fabregas verður seldur frá félaginu.
Gæti keypt: Framherja
Gæti einnig skoðað: Miðjumann
Möguleg skotmörk: Kevin Gameiro, Adrien Rabiot, Kylian Mpappe
Mauricio Pochettino, stjóri Tottenham, lét hafa eftir sér í fjölmiðlum í vikunni að liðið þyrfti að styrkja sig talsvert í sumar án þess þó að nefna einhverjar stöður. Tottenham er með tvo af bestu bakvörðum Englands, frábæran markmann, öfluga miðju og einn heitasta framherja Evrópu í Harry Kane. Það vantar í raun ekki mikið upp á hjá Tottenham. Liðið þarf þó meiri breidd að því leyti að þegar lykilmenn meiðast finnur liðið mjög fyrir fjarveru þeirra. Mikið mæðir á Harry Kane í fremstu víglínu og Vincent Jansen hefur ekki fundið fjöl sína í enska boltanum. Þá hefur Moussa Sissoko ekki náð sér á strik hjá Tottenham og munar um minna. Liðið hefur verið orðað við Kevin Gameiro, framherja Atletico Madrid, Kylian Mbappe, vængmann Monaco sem og Adrien Rabiot, miðjumann PSG, í Frakklandi. Mögulega gætu þessir leikmenn komið liðinu í allra fremstu röð.
Gæti keypt: Varnarmann, bakvörð
Gæti einnig skoðað: Markmann
Möguleg skotmörk: Virgil van Dijk, Fabinho, Jordan Pickford
Tímabilið hjá Manchester City hefur verið hálf einkennilegt. Á köflum hefur liðið leikið flottasta boltann en dottið niður í svaðið þess á milli. Vandræði City liggja þó fyrst og fremst aftast á vellinum eins og glögglega sést þegar stigataflan er skoðuð. Liðið hefur fengið á sig 29 mörk í 26 leikjum sem er einfaldlega of mikið. Varnarjaxlinn Vincent Kompany hefur varla spilað leik á tímabilinu og hefur hinum unga John Stones tilfinnanlega vantað leiðsögn í hjarta varnarinnar. Ef Kompany nær sér ekki aftur á strik þarf City að finna öflugan leiðtoga í vörnina fyrir næsta tímabil. Einn þeirra sem þykja koma til greina er Virgil van Dijk hjá Southampton. Þá má geta þess farið er að líða á seinni hlutann á ferli þeirra Bacary Sagna og Gael Clichy og hefur vinstri bakvörðurinn og miðjumaðurinn Fabinho hjá Monaco verið orðaður við City. Loks má benda á að Claudio Bravo hefur legið undir gagnrýni á tímabilinu og það ekki að ástæðulausu. Jordan Pickford, markvörður Sunderland, hefur verið orðaður við City en líklegt þykir þó að Pep Guardiola haldi tryggð við Bravo.
Gæti keypt: Framherja
Gæti einnig keypt: Miðjumann
Möguleg skotmkörk: Adrien Rabiot, Lorenzo Insigne, Andrea Belotti, Kylian Mbappe
Arsenal hefur verið í talsverðu basli undanfarnar vikur og hefur Arsene Wenger enn eina ferðina setið undir gagnrýni. Liðið er í harðri keppni um að komast í Meistaradeildina að ári og alls ekki öruggt um sæti þar. Vitað er að Arsene Wenger hefur verið á höttunum eftir framherja en það hefur ekki gengið sem skyldi. Þá hefur Arsenal vantað leiðtoga á miðjuna, leikmann sem getur stjórnað leikjum upp á eigin spýtur. Granit Xhaka er ekki kominn þangað og þá hefur spurningarmerki verið sett við frammistöðu Francis Coquelin í vetur. Ljóst er að Arsenal mun leita allra leiða til að styrkja hópinn í sumar og hefur Adrien Rabiot hjá PSG verið nefndur sem valkostur á miðjuna. Hann er í hópi efnilegustu miðjumanna heims. Þá er Wenger sagður hafa augastað á Ítalanum Andrea Belotti, framherja Torino, sem er markahæsti leikmaður ítölsku deildarinnar með 19 mörk.
Gæti keypt:Varnarmann
Gæti einnig keypt: Markvörð
Möguleg skotmörk: Virgil van Dijk, Alexandre Lacazette, Mattia De Sciglio
Eftir fína byrjun á leiktíðinni hefur gefið á bátinn að undanförnu hjá lærisveinum Jurgen Klopp. Einhverjir vilja meina að mikið leikjaálag um og upp úr áramótum hafi gert liðinu erfitt fyrir en eftir nokkuð gott frí kom 3-1 skellur gegn Leicester í vikunni. Jamie Carragher, fyrrverandi leikmaður Liverpool, benti í kjölfarið á nokkur atriði sem betur mættu fara. Í fyrsta lagi benti hann á að James Milner væri ekki vinstri bakvörður og í öðru lagi að Lucas Leiva væri ekki miðvörður. Hvorki honum né liðinu væri greiði gerður með því að spila honum úr stöðu. Enginn velkist í vafa um að Liverpool er með eitt allra skemmtilegasta sóknarlið deildarinnar þegar það spilar vel. Vandamálin liggja annars staðar eins og Carragher benti á. Liverpool hefur fengið á sig flest mörk þeirra liða sem skipa efstu sex sætin; margir vilja meina að hvorki Simon Mignolet né Loris Karius séu nógu góðir til að vera aðalmarkmenn og þá virðist liðið líða fyrir það að hafa ekki ekki alvöru leiðtoga í miðri vörninni. Klopp bíður það vandasama verkefni að stoppa í götin í vörninni. Loks má geta þess að margir stuðningsmenn liðsins hafa kallað eftir nýjum framherja, enda hafa bæði Danny Ings og Daniel Sturridge glímt við erfið meiðsl undanfarin misseri.
Gæti keypt: Miðjumann
Gæti einnig keypt: Bakvörð, framherja
Möguleg skotmörk: Neymar, Fabinho, Moussa Dembele, Victor Lindelöf, Antoine Griezmann
Manchester United hefur náð vopnum sínum að undanförnu eftir erfiða byrjun. Enn er þó ýmsa veikleika að finna á United-liðinu þrátt fyrir að milljörðum hafi verið varið í leikmannakaup á undanförnum árum. Fyrir það fyrsta þarf United að fara að finna leikmann sem getur fyllt skarð Michael Carrick á miðjunni. Carrick er á lokametrunum á sínum ferli en enn gríðarlega mikilvægur. Þá hefur mikið mætt á Zlatan Ibrahimovic í fremstu víglínu og hann hefur að mestu séð um markaskorun á tímabilinu. Þar sem hann er orðinn 35 ára og verður auk þess samningslaus í sumar þarf United að fara að huga að eftirmanni hans. Þá hefur staða vinstri bakvarðar verið höfuðverkur fyrir Mourinho; hann virðist ekki treysta Luke Shaw í verkefnið, Matteo Darmian hefur verið ótraustur eins og Marcos Rojo sem nýtist best í miðri vörninni. United hefur verið orðað við ýmsa leikmenn undanfarnar vikur; því er haldið fram að það sé nánast frágengið að Antoine Griezmann komi til félagsins í sumar og þá hefur Neymar hjá Barcelona verið orðaður við liðið. Moussa Dembele hjá Celtic gæti komið eins og Fabinho, vinstri bakvörður Monaco sem einnig getur spilað á miðjunni.
