„Það var Höddi Magg sem skoraði sigurmarkið og það er Höddi Magg sem þakkar fyrir sig“

Flottur sigur á Írum á útivelli

Strákarnir fögnuðu marki Harðar vel.
Skot og mark Strákarnir fögnuðu marki Harðar vel.
Mynd: EPA

Hörður Björgvin Magnússon skoraði eina markið í knatttspyrnuleik Íslands og Írlands sem fram fór ytra nú í kvöld. Íslendingar voru sprækari en heimamenn í fyrri hálfleik, og sýndu oft á tíðum lipra takta. Um var að ræða æfingaleik en nokkrir fastamenn úr hefðbundnu byrjunarliði Heimis Hallgrímssonar byrjuðu leikinn í dag. Þeirra á meðal voru Aron Einar Gunnarsson, Birkir Már Sævarsson og Ragnar Sigurðsson.

Það var Hörður Björgvin Magnússon sem skoraði eina mark leiksins með hnitmiðuðu skoti úr beint úr aukaspyrnu um miðbik fyrri hálfleiks. Hann átti góðan leik en Kjartan Henry FInnbogason og Aron Sigurðarson voru áberandi sprækir - að öðrum ólöstuðum.

Írar ógnuðu aldrei marki Íslands í leiknum, þó þeir hafi haldið boltanum meira í síðari hálfleik. Ragnar Sigurðsson, Sverrir Ingi Ingason og síðar Hólmar Örn Eyjólfsson voru sem klettar í vörninni og skölluðu allt í burtu sem að teignum kom. Eina skot Íra að marki kom á síðustu andartökum leiksins en það var máttlítið. Ögmundur Kristinsson átti annars fremur náðugan dag í markinu.

Ísland vann því báða leikina í þessari landsleikjahrinu en á föstudaginn hafði liðið betur gegn Kósóvó í undankeppni HM. Næsti keppnisleikur er í júní, en þá koma Króatar í heimsókn í baráttu efstu liða riðilsins.

Hörður Magnússon, Höddi Magg, lýsti leiknum á Stöð 2 sport, en það var nafni hans, Hörður Björgvin Magnússon, sem skoraði sigurmarkið. Hann lauk útsendingunni á þessum orðum: „Það var Höddi Magg sem skoraði sigurmarkið og það er Höddi Magg sem þakkar fyrir sig“.

FJölnismaðurinn Aron Sigurðarson var afar sprækur í kvöld.
Góður í kvöld FJölnismaðurinn Aron Sigurðarson var afar sprækur í kvöld.
Mynd: EPA

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.