Hver á að skora mörkin?

Gylfi þarf hjálp gegn Kósóvó - Fær Viðar langþráð tækifæri?

Alfreð Finnbogason, Jóhann Berg Guðmundsson og Birkir Bjarnason eru fjarri góðu gamni. Á myndina vantar einnig Kolbein Sigþórsson sem hefur verið frá vegna meiðsla í nokkra mánuði.
Margir meiddir Alfreð Finnbogason, Jóhann Berg Guðmundsson og Birkir Bjarnason eru fjarri góðu gamni. Á myndina vantar einnig Kolbein Sigþórsson sem hefur verið frá vegna meiðsla í nokkra mánuði.
Mynd: EPA

Það hefur verið bjartara útlit yfir íslenskum landsliðsmönnum en akkúrat þessa dagana. Þann 24. mars er mikilvægur leikur við Kósóvó í undankeppni HM, leikur sem þarf að vinnast svo íslenska liðið eigi möguleika á að komast á HM í Rússlandi 2018.

Staðan á lykilmönnum Íslands er ekki góð en fjórir leikmenn sem hafa allir leikið mjög stórt hlutverk síðustu ár verða líklega ekki með í leiknum. Útilokað er að Kolbeinn Sigþórsson verði með en þessi frábæri framherji hefur ekki spilað leik síðan í ágúst og óvíst er hvenær hann spilar aftur. Birkir Bjarnason verður frá næstu tvo mánuðina en hann hefur leikið stórt hlutverk í landsliðinu síðustu ár. Mjög ólíklegt er að Jóhann Berg Guðmundsson, kantmaður Burnley, verði með en hann glímir við hnémeiðsli. Hann og Birkir Bjarnason hafa átt fast sæti hvor á sínum kantinum síðustu ár. Alfreð Finnbogason, framherji Augsburg í Þýskalandi, hefur ekki spilað síðan í september og óvíst er hvenær hann snýr aftur á völlinn. Þetta eru stór skörð sem þjálfarinn, Heimir Hallgrímsson, þarf að fylla.

Meiddir með 46 mörk

Líklegt byrjunarlið: Hannes Þór Halldórsson 0 mörk

Birkir Már Sævarsson 1 mark Ragnar Sigurðsson 3 mörk Kári Árnason 3 mörk Ari Freyr Skúlason 0 mörk

Arnór Ingvi Traustason 5 mörk Aron Einar Gunnarsson 2 mörk Gylfi Þór Sigurðsson 14 mörk Emil Hallfreðsson 1 mark

Jón Daði Böðvarsson 2 mörk Viðar Örn Kjartansson 1 mark

32 mörk

Meiddir Kolbeinn Sigþórsson 22 mörk Alfreð Finnbogason 11 mörk Jóhann Berg Guðmundsson 5 mörk Birkir Bjarnason 8 mörk

46 mörk

Hver á að skora mörkin?

Þegar þessir fjórir leikmenn eru teknir út úr dæminu sést að 46 mörk hverfa á einu bretti. Mestu munar þar um Kolbein sem hefur skorað 22 mörk fyrir landsliðið. Ef mögulegt byrjunarlið Íslands fyrir leikinn gegn Kósóvó er skoðað má sjá að þar hafa þeir tíu útileikmenn sem líklegastir eru til að byrja leikinn skorað 32 mörk, 14 mörkum minna en þeir fjórir sem frá eru vegna meiðsla.

Gylfi Þór Sigurðsson er langlíklegastur til þess að skora fyrir landsliðið, hann hefur skorað 14 mörk fyrir landsliðið sem er níu mörkum meira en næsti maður. Arnór Ingvi Traustason hefur skorað fimm mörk fyrir landsliðið á stuttum tíma og ætti að fá tækifæri í þessum leik vegna meiðsla Birkis og Jóhanns.

Ískaldur Jón Daði

Jón Daði Böðvarsson, framherji Wolves, hefur ekki skorað mark í leik síðan í ágúst og hans styrkleiki fyrir landsliðið hefur ekki verið markaskorun. Nú þegar Kolbeinn og Alfreð eru meiddir er langlíklegast að Viðar Örn Kjartansson fái tækifæri. Hann hefur ekki fengið mörg af þeim með landsliðinu en spilamennska hans í Ísrael ætti að gefa honum sénsinn. Viðar hefur skorað mikið undanfarið og ætti að vera líklegur til afreka gegn Kósóvó. Viðar hefur þó aðeins skorað eitt mark fyrir Ísland.

Miðverðirnir:

Ragnar Sigurðsson og Kári Árnason hafa átt þessar stöður síðustu ár en báðir hafa verið á betri stað en einmitt þessa stundina, Kári hefur verið að glíma við meiðsli en er að ná sér og ætti að spila næstu leiki Omonia á Kýpur. Ragnar Sigurðsson er hins vegar úti í kuldanum hjá Fulham á Englandi, Ragnar hefur ekkert fengið að spila síðustu vikur. Ólíklegt er þó að Heimir Hallgrímsson breyti einhverju í hjarta varnarinnar enda hafa Ragnar og Kári átt góðu gengi að fagna með landsliðinu.

Ekki bara dökkar hliðar

Það eru þó ekki bara dökkar hliðar sem blasa við landsliðinu nú um stundir. Aron Einar Gunnarsson og Gylfi Þór Sigurðsson eru líklega mikilvægustu leikmenn liðsins og þeir eru báðir í sínu besta formi á ferlinum, Gylfi hefur verið frábær með Swansea í ensku úrvalsdeildinni á sama tíma og Aron Einar hefur reynst Cardiff frábærlega í næstefstu deild Englands. Emil Hallfreðsson hefur einnig verið frábær með Udinese á Ítalíu og hann ætti að fá langþráð tækifæri í alvöru landsleik. Mörgum þykir Emil ekki fá það hrós sem hann hefur átt skilið á Íslandi og nú gæti hann fengið tækifæri til að minna rækilega á sig.

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.