Claudio Ranieri hefur verið rekinn úr starfi knattspyrnustjóra Leicester, innan við ári eftir að hann leiddi liðið til sigurs í ensku úrvalsdeildinni. Gengi Leicester hefur valdið vonbrigðum á tímabilinu og er liðið nú aðeins einu stigi frá fallsvæðinu eftir afleitt gengi í deildinni að undanförnu.

Leicester tapaði fyrri leik sínum í 16-liða úrslitum Meistaradeildarinnar gegn Sevilla í gærkvöldi, 2-1, og er í ágætum málum fyrir seinni leikinn. Þó að liðið hafi náð ágætis úrslitum í gærkvöldi var það ekki nóg. Breska blaðið Guardian greindi frá því í kvöld að Ranieri hafi verið kallaður til fundar við komuna til Englands í morgun og þar hafi hann fengið þær fréttir að ekki yrði óskað eftir hans kröftum lengur.

„Þetta var erfiðasta ákvörðun sem félagið hefur þurft að taka á þeim sjö árum sem liðin eru síðan King Power eignaðist félagið,“ sagði Leicester í yfirlýsingu í kvöld. Það verði að taka langtíma hagsmuni félagsins fram yfir hagsmuni einstakra einstaklinga innan félagsins og stjórn Leicester hafi talið réttast að fá nýjan mann til að stýra Leicester. Ekki liggur fyrir hver tekur við starfinu.

Eins og allir vita leiddi Ranieri Leicester til sigurs í ensku úrvalsdeildinni á síðasta tímabili og er árangurinn sem liðið náði í fyrra í flokki með mestu íþróttaafrekum sögunnar. Margir spáðu liðinu falli í fyrra en þvert á væntingar stóð Leicester uppi sem sigurvegari. Félagið þakkaði Ranieri fyrir vel unnin störf í yfirlýsingu sinni og sagði að félagið yrði þakklátt honum um ókomin ár.

„Vonir okkar eða væntingar voru aldrei þær að félagið myndi endurtaka leikinn frá því í fyrra. Raunar var fyrsta markmið félagsins að halda sér í deild þeirra bestu. Nú stöndum við hins vegar frammi fyrir mikilli baráttu við að ná því markmiði og það er mat félagsins að breytinga sé þörf til að ná því í þeim þrettán leikjum sem eftir eru.“