United mætir Saint-Etienne í 32-liða úrslitum Evrópudeildarinnar
Manchester United mætir Saint-Etienne í fyrri leik liðanna í 32-liða úrslitum Evrópudeildarinnar á Old Trafford í kvöld. Leikurinn er athyglisverður fyrir margra hluta sakir.
Manchester United er sigursælasta lið Englands á meðan Saint-Etienne er sigursælasta lið Frakklands. Þá eru Paul Pogba, leikmaður Manchester United, og Florentin Pogba, leikmaður Saint-Etienne, bræður. Loks mun Zlatan Ibrahimovic, framherji United, mæta liðinu sem hann hefur oftast skorað gegn.
Meðan Zlatan lék með PSG í Frakklandi lék hann 13 sinnum gegn Saint-Etienne. Í þessum 13 leikjum skoraði Zlatan hvorki meira né minna en 14 mörk, fleiri en gegn nokkru liði á frábærum ferli sínum sem atvinnumaður.
Meðan Zlatan lék á Ítalíu skoraði hann 12 mörk gegn Palermo og hjá PSG í Frakklandi skoraði hann 11 mörk gegn Marseille og Nice. Þá hefur hann skorað 10 mörk gegn Bastia, Roma og Parma, 9 mörk gegn Nates, Lyon og Toulouse og 8 mörk gegn Fiorentina og Lorient.
Zlatan hefur verið í fínu formi með Manchester United á leiktíðinni og er búinn að skora 20 mörk í 34 leikjum.
Leikur United og Saint-Etienne hefst klukkan 20 í kvöld.
