Einn spilar í Kasakstan en annar í Rússlandi – Sjö ár síðan Arsenal komst áfram úr útsláttarkeppni Meistaradeildarinnar
Arsenal heimsækir Bayern Munchen í 16-liða úrslitum Meistaradeildarinnar í kvöld. Langt er liðið síðan Arsenal komst síðast í 8-liða úrslit keppninnar en það gerðist síðast árið 2010. Þá vann liðið einvígi gegn Porto, 6-2 samanlagt, en tapaði svo gegn Barcelona, 6-3 samanlagt.
Frá árinu 2010 hefur Arsenal alltaf komist í Meistaradeildina en ávallt verið slegið úr leik í 16-liða úrslitum. Ljóst er að erfitt verkefni bíður lærisveina Arsene Wenger, en langt því frá ómögulegt. Bayern trónir á toppi þýsku deildarinnar en yfirburðir liðsins í vetur hafa ekki verið jafn miklir og undanfarin ár.
Breska blaðið Daily Mail birti skemmtilegan fróðleik um lið Arsenal sem síðast vann einvígi í útsláttarkeppni. Athygli er vakin á því að aðeins eru teknar saman upplýsingar um þá leikmenn sem byrjuðu í 5-0 sigri Arsenal á Porto þann 9. mars árið 2010.
Almunia var keyptur til Arsenal árið 2004 og var varamarkvörður fyrir Jens Lehmann lengi vel. Hann lék hátt í 200 leiki fyrir félagið áður en hann hvarf á braut árið 2012 og gekk til liðs við Watford. Hann lagði hanskana á hilluna árið 2014 að læknisráði eftir að hafa greinst með hjartagalla.
Sagna gekk til liðs við Arsenal árið 2007 og tók við treyju númer 3 sem Ashley Cole spilaði í. Hann var lykilmaður í vörn liðsins lengi vel en yfirgaf félagið árið 2014 og gekk til liðs við Manchester City. Þar er hann enn í dag og spilar reglulega.
Vermaelen byrjaði vel hjá Arsenal og var lykilmaður fljótlega eftir komuna frá Ajax árið 2009. Meiðsli settu strik í reikninginn hjá þessum öfluga leikmanni sem yfirgaf félagið árið 2014 og gekk í raðir Barcelona. Þar glímdi hann áfram við meiðsli og var lánaður í fyrrasumar til Roma. Á þessu tímabili hefur hann spilað sex leiki.
Sol Campbell verður líklega helst minnst fyrir tíma sinn hjá Arsenal á árunum 2001 til 2006. Hann gekk samt aftur til liðs við Arsenal um skamma hríð árið 2010 og lék í umræddum leik gegn Porto. Hann lagði skóna á hilluna árið 2011 eftir flottan feril á Englandi.
Franski vinstri bakvörðurinn gekk ungur í raðir Arsenal og spilaði með félaginu í átta ár, eða allt til ársins 2011 að hann var seldur til Manchester City. Þar spilar hann enn.
Tékkneski miðjumaðurinn var stórkostlegur leikmaður þegar hann var heill. Áður en að leiknum gegn Porto kom hafði hann verið á mála hjá Arsenal í fimm ár. Hann yfirgaf Arsenal í fyrrasumar og gekk til liðs við Spörtu í Prag í heimalandi sínu.
Frakkinn öflugi glímdi ítrekað við meiðsli líkt og Rosicky. Þetta tímabil tókst Diaby þó að spila 40 leiki fyrir Arsenal. Síðan þá hefur hann hins vegar aldrei náð neinu flugi og nær ávallt verið á sjúkralistanum af ýmsum ástæðum. Diaby yfirgaf Arsenal árið 2015 og gekk til liðs við Marseille þar sem, jú, meiðsli hafa sett strik í reikninginn.
Song var eitt af fyrstu nöfnunum sem Arsene Wenger setti á leikskýrsluna þegar hann var upp á sitt besta. Song spilaði í það heila 227 leiki fyrir Arsenal en vann þó ekki neina titla með félaginu. Árið 2012 gekk hann til liðs við Barcelona eftir að hafa átt frábært tímabil. Samkeppnin um sæti í liði Barcelona var mikil og svo fór að hann var lánaður til West Ham í tvö tímabil. Hann gekk til liðs við Rubin Kazan í Rússlandi á frjálsri sölu síðasta sumar.
Frakkinn magnaði var þekktur fyrir að vera óstýrilátur og hann er ekki í uppáhaldi hjá mörgum stuðningsmönnum liðsins. Eftir að hafa átt frábært tímabil, tímabilið 2010 til 2011, var hann seldur til Manchester City fyrir 25 milljónir punda. Nasri er enn leikmaður City en leikur sem lánsmaður hjá Sevilla.
Bendtner reyndist Arsenal ágætlega á köflum og þá sérstaklega í seinni leiknum gegn Porto þar sem hann skoraði þrennu. Á sjö tímabilum hjá Arsenal skoraði Daninn 45 mörk í 171 leik. Honum tókst þó aldrei að verða aðalmaðurinn í framlínu Arsenal og lék sem lánsmaður hjá Birmingham, Sunderland og Juventus þar á meðal. Bendtner fór til Wolfsburg árið 2014 en leikur í dag með Nottingham Forest í B-deildinni á Englandi.
Rússinn öflugi var ótrúlega góður þegar hann var á deginum sínum. Þetta tímabil skoraði Arshavin tólf mörk og var einn af lykilmönnunum í sóknarleik liðsins. Arshavin, sem í dag er 35 ára, fór frá Arsenal árið 2013 og gekk til liðs við Zenit í heimalandi sínu. Í dag spilar hann hins vegar með liði FC Kairat í Kasakstan.