Hafði betur gegn Birni Einarssyni með 83 atkvæðum gegn 66
Guðni Bergsson, fyrrverandi landsliðsmaður í knattspyrnu, var í dag kjörinn formaður Knattspyrnusambands Íslands. Kosið var á ársþingi KSÍ sem fram fer í Vestmannaeyjum.
Guðni barðist við Björn Einarsson, formann Víkings, um formannsembættið, en Geir Þorsteinsson tilkynnti sem kunnugt er í byrjun árs að hann hygðist láta af embætti eftir tíu ára setu á stóli formanns.
Tvísýnt var um niðurstöðu formannskosningarinnar en svo fór að Guðni hlaut 83 atkvæði en Björn 66. Guðni, sem er lögfræðimenntaður, er 51 árs. Hann lék á sínum tíma 80 landsleiki fyrir Ísland. Þá lék hann í fjölmörg ár á Englandi, bæði með Tottenham og Bolton.
Í sigurræðu sinni, sem Fótbolti.net vitnar til, sagðist Guðni ætla að gera sitt besta og gera íslenskan fótbolta að stolti allra Íslendinga. Þá þakkaði hann Birni fyrir drengilega baráttu í aðdraganda kosninganna.