Sagði auðvelt að múta þjálfurum í neðri deildum
Aðstoðarknattspyrnustjóri Southampton, Eric Black, hefur bæst í hóp þeirra sem Daily Telegraph hefur afhjúpað fyrir spillingu. Blaðið hefur birt myndband af honum þar sem hann er að ráðleggja mönnum að múta þjálfurum neðrideildarliða til að eiga auðveldara með að kaupa af þeim leikmenn. Nokkur þúsund pund myndu hjálpa til.
„Það þarf ekki mikið til að fá menn til að taka þátt,“ segir hann í myndbandinu. „Því þeir eiga ekki mikinn pening.“
Í lögum enska knattspyrnusambandsins kemur skýrt fram að slíkar greiðslur eru harðbannaðar. Raunar ber mönnum í stöðu Black að tilkynna tafarlaust ef hann kemst á snoðir um að til standi að sniðganga reglur sambandsins.
Black virðist vera enn einn þjálfarinn sem mun fá að fjúka vegna spillingar. Afhjúpanir blaðsins náðu hámarki þegar Sam Allardyce, sem var nýtekinn við enska landsliðinu, hætti með liðið eftir rúma 60 daga í starfi. Fleiri hafa bæst í hópinn svo sem Jimmy Floyd Hesselbaink, þjálfari QPR.
Búast má við að Black verði látinn fara frá Southampton en Ralph Krueger, stjórnarformaður Southampton, hefur látið hafa eftir sér áður að hann sé harmi sleginn vegna þeirra fregna sem hafa komið upp á yfirborðið. Í því ljósi verður að þykja líklegt að hann reki Black.