Lagði Ashley „Doll Face“ Greenway sannfærandi
Sunna Rannveig Davíðsdóttir bar sigur úr bítum í sínum fyrsta atvinnubardaga í MMA í gærkvöldi, en Sunna vann allar loturnar gegn Ashley „Doll Face“ Greenway. MMA-fréttir fjalla um bardagann.
Þar segir að Sunna hafi í raun unnið öruggan sigur og stjórnað pressunni allan bardagann. Svo virðist vera sem styrkleikar Sunnu hafi komið Ashley á óvart og varðist Sunna fimlega þegar Ashley reyndi að setja á hana pressu. Niðurstaðan varð 30-27 hjá öllum dómurum og fyrsti sigurinn í höfn hjá þessari öflugu bardagakonu.
Með bardaga sínum í gærkvöldi varð Sunna fyrsta íslenska konan til að keppa sem atvinnumaður í MMA.