Knattspyrnusamband Íslands kom í veg fyrir að Ísland yrði í nýjasta FIFA-tölvuleiknum, FIFA 17, sem kemur út innan skamms. Ástæðan er sú að EA Sports bauð KSÍ of lága upphæð fyrir réttindin, að sögn Geirs Þorsteinssonar, formanns KSÍ.

Nútíminn greinir frá þessu.

Í samtali við Nútímann segir Geir að EA Sports, sem framleiðir leikinn, hafi boðið KSÍ lítilræði sem ekki var hægt að sætta sig við. Áhugi var fyrir því hjá EA Sports að hafa Ísland með í leiknum og má væntanlega þakka það miklum uppgangi íslenska karlalandsliðsins á undanförnum árum og góðum árangri liðsins á EM í sumar.

Leikurinn nýtur mikilla vinsælda hjá knattspyrnuáhugamönnum hér á landi, þá sérstaklega ungmennum. Íslenskir FIFA-spilarar verða samt að gera sér að góðu að spila leikinn án þess að Ísland komi við sögu.