Miklu ofar en Svíar, Danir og Norðmenn – Argentínumenn efstir
Íslenska karlalandsliðið í knattspyrnu fellur um fjögur sæti á nýjum styrkleikalista FIFA sem gefinn var út í morgun. Íslenska liðið er nú í 27. sæti á listanum með 829 stig.
Ef marka má styrkleikalista FIFA stendur Ísland langfremst Norðurlandaþjóðanna í knattspyrnu. Svíar koma næstir á eftir Íslendingum í 41. sæti, Danir eru í 46. sæti, Norðmenn eru í 70. sæti og Finnar í 84. sæti.
Ísland gerði sem kunnugt er 1-1 jafntefli við Úkraínu í byrjun mánaðarins og er það eini leikur íslenska liðsins frá því að síðasti listi var gefinn út, en þá var Ísland í 23. sæti.
Engin breyting hefur orðið á tveimur efstu sætunum. Argentínumenn eru sem fyrr í efsta sæti listan og Belgar eru í öðru sæti. Heimsmeistarar Þjóðverja eru í þriðja sæti og hafa þeir sætaskipti við Kólumbíumenn frá síðasta lista sem nú eru í fjórða sæti.
Brasilía er í 5. sæti, Chile í 6. sæti og þar á eftir koma Portúgal, Frakkland, Úrúgvæ og Wales. Spánverjar eru í 11. sæti, Englendingar í 12. sæti og Ítalir í því þrettánda.
Hér má sjá styrkleikalistann.