Ný ævisaga kappans lítur dagsins ljós
Markahrókurinn Ian Wright, sem meðal annars gerði garðinn frægan hjá Arsenal á árum áður, lagði það í vana sinn að reykja gras fyrir leiki.
Þetta segist Wrigth hafa gert fyrir ófáa stórleiki til að ráða betur við kvíða sem hann glímdi við. Wright, sem í dag er 52 ára, er í hópi markahæstu leikmanna ensku úrvalsdeildarinnar frá upphafi. Hann skoraði 113 mörk í 213 leikjum og varð Englandsmeistari með Arsenal vorið 1998.
Wright segir að hann hafi nánast lagt feril sinn í rúst þegar hann var ungur að árum og enn leikmaður Crystal Palace. Í nýrri ævisögu kappans rifjar hann upp leik á milli Crystal Palace og West Brom sem endaði með 4-1 sigri Palace. Aðeins nokkrum klukkustundum fyrir leik reykti Wright gras.
Eftir leik var sigrinum fagnað vel og innilega en gleðin hjá Wright var fljót að breytast þegar hann fékk veður af því að verið væri að taka leikmenn í lyfjapróf eftir leikinn. „Ég óttaðist viðbrögð fólks í hverfinu mínu og stuðningsmanna liðsins ef ég hefði verið tekinn í lyfjapróf.“
Sem betur fer fyrir Wright var hann ekki tekinn í lyfjapróf. Í ævisögunni segist hann ekki hafa verið stórreykingarmaður á grasi – þetta hafi samt verið ákveðin hefð hjá honum við lok hverrar viku. „Mér fannst ég ekki vera að gera neitt rangt.“