„Ég er smá sorgmæddur því ég vildi vinna gull fyrir ástina mína, Stefaníu“
„Það er allt í lagi að leyfa öðrum að fá gull. Kínverjinn átti það skilið hvort sem er,“ sagði Jón Margeir Sverrisson, sem lenti í fjórða sæti í úrslitum í 200 metra skriðsundi á Ólympíumótinu í Rio í gærkvöldi.
RÚV ræddi við Jón Margeir eftir úrslitasundið, en hann endaði sundið á tímanum 1.57.50 sem er 56 hundraðshlutum úr sekúndu frá hans besta árangri.
„Ég er samt sáttur við tímann, hann er betri en ég bjóst við. En þetta var erfitt í lokin. Svona er þetta bara,“ sagði Jón Margeir sem kvaðst þó vera sorgmæddur eftir úrslitasundið.
„Ég hefði viljað fara á pall. Ég er smá sorgmæddur því ég vildi vinna gull fyrir ástina mína, Stefaníu. Ég vildi vinna gull fyrir hana en svona er þetta bara,“ sagði þessi frábæri íþróttamaður. Í viðtalinu við RÚV sagðist hann ætla að kveðja sundið í bili.
„Ég held að þríþrautin sé eina greinin sem ég sé framtíð í,“ sagði Jón Margeir sem kveðst ætla að einbeita sér að þríþrautinni á næstu árum. Jón Margeir þakkaði að lokum styrktaraðilum, fjölskyldu og kærustu sinni, Stefaníu, fyrir allan stuðninginn á undanförnum misserum.