Óhætt er að segja að unglingalið spænska stórliðsins Barcelona, skipað leikmönnum 12 ára og yngri, hafi sýnt af sér fádæma drenglyndi eftir úrslitaleik liðsins gegn japanska liðinu Omiya Ardija Junior í gær.

Liðin áttust við í úrslitaleik Junior Soccer World Challenge-mótsins og fór svo að liðsmenn Barcelona báru sigur úr bítum eftir hörkuleik, 1-0.

Eins og gefur að skilja voru leikmenn japanska liðsins miður sín yfir því að hafa tapað leiknum. Margir leikmanna liðsins voru óhuggandi og áttu um sárt að binda, enda mótið eitt það stærsta sinnar tegundar í heiminum.

Myndband af því sem gerðist eftir leik hefur farið sem eldur í sinu um netið, en þar má sjá leikmenn Barcelona stappa stálinu í leikmenn japanska liðsins. Þeir þakka þeim ekki bara fyrir leikinn, heldur taka utan um þá, hughreista þá og reyna hvað þeir geta að hugga þá.

Fremstur í flokki fór fyrirliði Barcelona-liðsins, Adria Capdevila Puigmal. Óhætt er að segja það þarna fari efnilegir íþróttamenn sem eru lausir við allan óþarfa hroka. Og mættu eflaust margir taka sér þá til fyrirmyndar.