Ekkert pláss fyrir Cristiano
Brasilíumaðurinn Ronaldo, sem sumir kalla hinn eina sanna Ronaldo, hefur tekið saman úrvalslið þeirra leikmanna sem eru bestir í knattspyrnusögunni í sinni stöðu. Athygli vekur að ekkert pláss er fyrir Cristiano Ronaldo í liði brasilíska Ronaldo.
Ronaldo, sem er 39 ára, er af mörgum talinn einn besti framherji sögunnar en hann lék með liðum á borð við Barcelona, Real Madrid, Inter og AC Milan á glæsilegum ferli sínum. Hann varð heimsmeistari með Brasilíu árið 2002 og lék í það heila 98 landsleiki og skoraði 62 mörk.
Hér að neðan má sjá þá leikmenn sem Ronaldo valdi í úrvalslið sitt, en óhætt er að segja að það sé býsna óárennilegt.
Gianluigi Buffon: Enn markvörður númer 1 hjá ítalska landsliðinu. Er 38 ára gamall og hefur leikið yfir 160 landsleiki fyrir Ítalíu. Frábær markvörður og klárlega einn sá besti í sögunni.
Cafú: Stórkostlegur leikmaður á sínum tíma. Var þekktur fyrir að frábær í vörn og engu síðri í sókninni. Lék lengst af með Roma og AC Milan en hætti 2008. Lék 142 landsleiki fyrir Brasilíu.
Roberto Carlos: Óumdeilanlega einn besti vinstri bakvörður sögunnar. Frábær spyrnumaður sem lék lengst af með Real Madrid á Spáni. Lék 125 landsleiki fyrir Brasilíu.
Paolo Maldini: Það ætti ekki að koma neinum á óvart að Paolo Maldini sé í hjarta varnarinnar. Lék allan sinn feril með AC Milan þar sem hann vann allt sem hægt var að vinna.
Fabio Cannavaro: Cannavaro var valinn besti fótboltamaður heims árið 2006 en það ár varð hann einmitt heimsmeistari með Ítölum. Frábær varnarmaður á sínum tíma og líklega einn sá besti frá upphafi.
Diego Maradona: Ronaldo ákvað að skella argentínska snillingnum á hægri vænginn. Enginn efast um hæfileika Maradona sem margir vilja meina að sé sá allra besti frá upphafi.
Lionel Messi: Annar argentínskur snillingur, Lionel Messi, er í liði Ronaldo. Messi er að sjálfsögðu enn í fullu fjöri með Barcelona þar sem hann hefur unnið alla þá titla sem í boði eru.
Zinedine Zidane: Zidane er á miðjunni í liði Ronaldo og kemur það líklega engum á óvart. Einn allra besti leikmaður sinnar kynslóðar.
Andrea Pirlo: Pirlo er þriðji Ítalinn í liðinu og hann fær pláss við hlið Zidane á miðjunni. Frábær fótboltamaður sem lék lengst af með AC Milan og Juventus. Var valinn í lið ársins í ítölsku A-deildinni fjögur ár í röð, frá 2011 til 2015.
Pele: Pele er að sjálfsögðu á sínum stað í liði Ronaldo enda Brassi og vitanlega stórbrotinn leikmaður á sínum tíma. Skoraði 77 mörk í 91 landsleik og varð heimsmeistari í þrígang með Brasilíumönnum.
Ronaldo: Ronaldo velur að sjálfsögðu sjálfan sig í liðið, hvað annað? Hann varð heimsmeistari með Brössum tvisvar, 1994 og 2002 og var þrisvar valinn knattspyrnumaður ársins hjá FIFA; 1996, 1997 og 2002. Árið 2011 fékk hann sæti í frægðarhöll Real Madrid. Þangað komast engir aukvisar.