Á fundi með þjálfurum knattspyrnudeildar Fjölnis sem haldinn var í hátíðarsal Fjölnis í Dalhúsum í kvöld var upplýst að Þorlákur Árnason hefur verið ráðinn sem yfirþjálfari hjá Fjölni.
Þorlákur kemur til félagsins eftir tveggja ára dvöl í Svíþjóð þar sem hann hefur stýrt yfirþjálfun hjá IF Brommapojkarna.
Þorlákur er einn af reynslumestu þjálfurum landsins, áður en hann fór til Svíþjóðar stýrði hann U17 landslið Íslands ásamt afreksstarfi fyrir 13 til 17 ára iðkendur.
Þorlákur stýrði meistaraflokki kvenna hjá Stjörnunni ásamt því að vera yfirþjálfari hjá Stjörnunni í fimm ár. Einnig hefur hann starfað sem yfirþjálfari hjá Val og Fylki.
Þorlákur hefur byggt upp gott og öflugt starf hjá þeim félögum sem hann hefur komið að og er ánægjulegt að fá hann til liðs við sterkan hóp þjálfara hjá Fjölni til að leiða áframhaldandi vöxt og uppbyggingu félagsins. Þorlákur hefur störf 15. september.
Knattspyrnudeild Fjölnis býður Þorlák (Láka) Árnason hjartanlega velkominn til starfa og hlökkum við mikið til samstarfsins