Eygló Ósk Gústafsdóttir tryggði sér í nótt sæti í úrslitum í 200 metra baksundi á Ólympíuleikunum í Ríó. Í sundinu í undanúrslitum í nótt setti Eygló Ósk Íslands- og Norðurlandamet þegar hún synti á 2,08,84 mínútum. Hún varð þriðja í sínum riðli og kom inn í 7.-8. sæti en átta keppendur synda úrslitasundið sem verður næstu nótt.
Ungverska stúlkan Katinka Hosszú hafði nokkra yfirburði í sundinu í nótt og synti vegalengdina á 2,06,03 mínútum.
Eygló Ósk varð þriðji íslenski sundmaðurinn til að komast í úrslit í sundi á ólympíuleikum. Örn Arnarson synti til úrslita á leikunum í Sydney 2000 og hafnaði í fjórða sæti. Hrafnhildur Lúthersdóttir komst síðan í úrslit í þessari viku í Ríó þegar hún lenti í 6. sæti í 100 metra bringusundi.