Ástralskir íþróttamenn og þjálfarar sem búa sig nú undir Ólympíuleikana í Rio de Janeiro í Brasilíu dvelja á hótelum í borginni þar sem ástandið í Ólympíuþorpinu er óviðunandi. Leikarnir hefjast þann 5. ágúst næstkomandi.

Í frétt Sydney Morning Herald kemur fram að ástandið í þeim húsakynnum sem eiga að hýsa áströlsku íþróttamennina sé svo slæmt að það jaðri við að vera hættulegt. Þannig séu klósett stífluð, leki úr rörum og þá séu berskjaldaðir rafmagnsvírar á víð og dreif. Þá sé hreinlæti ábótavant í þorpinu.

Kitty Chiller, fyrrverandi Ólympíufari, fer fyrir ástralska hópnum í Rio og segir hún að verkamenn hafi unnið að viðgerðum í Ólympíuþorpinu undanfarna daga. Staðan sé samt þannig að ástralskt íþróttafólk, þjálfarar og liðsstjórar telja að öryggi sínu sé betur borgið utan þorpsins og þess vegna dvelji hópurinn á hótelum í borginni.

Eduardo Paes, borgarstjóri Rio, gerði lítið úr áhyggjum og umkvörtunum íþróttamannanna og sagði hann að aðstaðan í Rio væri betri en aðstaðan sem Ástralir buðu upp á á Ólympíuleikunum í Sydney árið 2000.

Ástralskir íþróttamenn eru ekki þeir einu sem lent hafa í hremmingum í Rio því Hollendingar og Ítalir eru einnig sagðir hafa kvartað undan aðstöðunnni. Íþróttamenn frá öllum heimshornum eru nú að koma sér fyrir í Rio þar sem lokaundirbúningurinn fyrir leikana hefst.

Ólympíuleikarnir verða sem fyrr segir settir þann 5. ágúst næstkomandi og standa þeir til 21. ágúst.