Steve Bruce hefur látið af störfum sem knattspyrnustjóri Hull City en hann kom liðinu upp í ensku úrvalsdeildina nú í vor. Bruce átti fund með forsvarsmönnum félagsins í dag þar sem hann tilkynnti þeim að hann hefði ákveðið að hætta. Rekstur Hull hefur verið losaralegur um skeið en félagið hefur verið til sölu í tvö ár.
Öll skipulagning fyrir tímabilið hefur verið í molum og enginn leikmaður verið keyptur til félagsins. Núna á undirbúningstímabilinu hafa nokkrir leikmenn verið að meiðast og verða lengi frá vegna þeirra. Leikmannahópurinn er þunnskipaður, allt í óvissu, þegar aðeins þrjár vikur eru í það að flautað verður til leiks í ensku úrvalsdeildinni.
Hull mætir ensku meisturunum í Leicester á heimavelli í fyrstu umferð. Bruce kom sterklega til greina í starf þjálfara enska landsliðsins á dögunum sem ekkert varð af.