Guðni Th. Jóhannesson, nýkjörinn forseti Íslands, segist ekki hafa nokkurn áhuga á því að sitja í heiðursstúkunni á leikjum íslenska liðsins á Evrópumótinu og sötra þar kampavín.

Fjallað er um íslenska landsliðið og velgengni þess á EM á vef CNN og eru nokkrir Íslendingar teknir tali. Meðal þeira er Guðni, en hann var sem kunnugt er meðal áhorfenda á leik Íslands og Englands í 16-liða úrslitum keppninnar.

Í fréttinni kemur fram að á sama tíma og flestir stjórnmálamenn þiggi það með þökkum að fá sæti í VIP-stúkunni sé annað uppi á teningnum hjá nýkjörnum forseta Íslands. Þvert á móti segist Guðni ekki geta beðið eftir að slást í hóp íslenskra stuðningsmanna í stúkunni sem allir hafa sama markmið: Hvetja íslenska liðið til dáða.

„Af hverju ætti ég að sötra kampavín í VIP-herbergi þegar ég get gert það hvar sem er í heiminum,“ spyr Guðni fréttamann. „Nei, ég ætla að vera á áhorfendapöllunum með stuðningsmönnunum og ég mun vera í landsleiðstreyjunni minni,“ segir Guðni sem bætir við að Frakkarnir ættu ekki að vanmeta íslenska liðið þegar liðin mætast á Stade de France í París á sunnudag.

Í umfjöllun CNN er afreki Íslands lýst, þá einna helst sigrinum gegn Englandi í Nice á mánudagskvöld. Íslenska liðið hafi í raun niðurlægt enska liðið. „Það var frábært að vera á vellinum í Nice – það féllu gleðitár,“ segir Guðni sem bætir við að gott gengi íslenska liðsins á EM hafi mikla þýðingu fyrir íslensku þjóðina.

„Auðvitað, þetta hefur mikla þýðingu fyrir íslensku þjóðina. Þetta sýnir að ef þú setur þér markmið, vinnur markvisst að því, og fólk stendur saman þá getur allt gerst.“