Breska blaðið Guardian tekur saman lista yfir bestu landslið Evrópu
Íslenska karlalandsliðið sem hrifið hefur heimsbyggðina með sér á Evrópumótinu í Frakklandi er eitt það allra sterkasta í Evrópu. Ísland er vitanlega komið í 8-liða úrslit Evrópumótsins en breska blaðið Guardian birti í morgun lista yfir sterkustu fótboltaþjóðir Evrópu. Þar er Ísland í 7. sæti, á undan þjóðum eins og Portúgal og Króatíu.
Guardian hefur birt lista (e. Power rankings) meðan á Evrópumótinu stendur en á umræddum lista er meðal annars tekið tillit til spilamennsku liða á Evrópumótinu og liðum raðað eftir styrkleika. Óhætt er að segja að íslenska liðið hafi tekið stökk á listanum því fyrir viku var Ísland í 13. sæti. Sigurinn á Englandi hefur fleytt Íslandi því upp um nokkur sæti á listanum.
Í umsögn Guardian um íslenska liðið segir meðal annars: „Eftir riðlakeppnina hófst umsögn okkar um íslenska liðið á þessum orðum:
„Þetta er draumur sem virðist engan endi ætla að taka“. Það á enn við en Ísland á allt hrós skilið fyrir spilamennsku sína gegn Englandi og þá staðreynd að Ísland kom til baka eftir að hafa lent undir í leiknum. Þetta er lið sem spilar svo einfaldan en árangursríkan fótbolta. Ísland á meira skilið en að vera þekkt sem liðið sem varð Englandi til skammar. Geta þeir einnig staðið uppi í hárinu á Frökkum, sem eiga það til að byrja rólega og eru vafasamir í vörninni? Á þessum tímapunkti í mótinu er ekki hægt að veðja gegn Íslandi.“
Portúgal er í 8. sæti á listanum og Króatar, sem margir spáðu góðu gengi á Evrópumótinu, er í 9. sæti. Þá er Sviss í 10. sæti listans, Spánn í 11. sætinu, og England í 14. sæti. Það skal tekið fram að listinn er ekki byggður á neinum sérstökum vísindum og er því aðeins um huglægt mat blaðamanna Guardian að ræða. Listinn sýnir þó, svo ekki verður um villst, að íslenska landsliðið ber að taka alvarlega eftir frábæra frammistöðu á Evrópumótinu í sumar.
Hér að neðan má sjá listann í heild sinni: