Er í flottum félagsskap nokkurra af bestu knattspyrnumönnum heims
Ragnar Sigurðsson sýndi stórkostlega frammistöðu í sigrinum gegn Englandi í gær og sagði Heimir Hallgrímsson, annar þjálfara íslenska liðsins, að með frammistöðu sinni hlyti Ragnar að hafa vakið athygli stærstu og bestu félagsliða heims.
Ragnar skoraði fyrra mark Íslands og átti frábæran leik í vörn íslenska liðsins. Hann var að öðrum ólöstuðum besti maður vallarins og hélt sóknarmönnum enska liðsins algjörlega í skefjum.
Vefritið WhoScored.com hefur valið lið umferðarinnar í 16-liða úrslitum keppninnar og er Ragnar að sjálfsögðu í hjarta varnarinnar. Ragnar er ekki í slæmum félagsskap því í markinu er Thibaut Courtois, markvörður Belga og Chelsea, og við hlið hans í vörninni er Giorgio Chiellini, varnarmaður Juventus og ítalska landsliðsins.
Aðrar stórstjörnur eiga sæti í liðinu, til dæmis Antoine Griezmann, Eden Hazaard, Kevin de Bruyne og Mario Gomez. Ragnari er gefin einkunnin 8,9 sem og er hann langhæstur af varnarmönnum úrvalsliðsins. Hazard, sem átti frábæran leik fyrir Belga gegn Ungverjum, fær 10 í einkunn og Antoine Griezmann 9,2.