Steve McClaren, fyrrverandi landsliðsþjálfara Englands, var illa brugðið þegar Kolbeinn Sigþórsson kom Íslandi yfir gegn Englandi í kvöld.

McClaren, sem hefur stýrt fjölda liða á Englandi, var landsliðsþjálfari Englands um skamma hríð árin 2006 og 2007. Hann lýsti leiknum beint á Sky Sports í kvöld og var vart búinn að ljúka lofræðu sinni um enska liðið þegar Kolbeinn skoraði markið sem skildi liðin að.

Eins og sést í meðfylgjandi myndbandi dásamaði McClaren sóknarleik Englendinga og sagði að Daniel Sturridge og Kyle Walker væru að valda íslenska liðinu allskonar vandræðum með sóknum sínum upp hægri vænginn. Þá væri Raheem Sterling stórhættulegur á hinum vængnum.

Svo kom markið í andlitið á Englendingum og er óhætt að segja að McClaren hafi hreinlega misst andlitið. Sjón er sögu ríkari en myndbandið má sjá hér að neðan.