Roy Hodgson, landsliðsþjálfari Englendinga, er sagður ætla að setja Adam Lallana, leikmann Liverpool, á bekkinn gegn Íslandi í kvöld og leyfa Raheem Sterling, leikmanni Manchester City, að spreyta sig í byrjunarliðinu.

Hodgson gerði sex breytingar á byrjunarliði Englands í lokaleik riðlakeppninnar gegn Slóvakíu, en hann er sagður ætla að gera frekari breytingar á byrjunarliðinu í kvöld.

Vefútgáfa breska blaðsins Daily Mail greinir frá þessu. Sterling var settur á bekkinn gegn Slóvökum eftir að hafa byrjað gegn Rússum og Walesverjum. Hann var gagnrýndur nokkuð fyrir frammistöðu sína í fyrstu tveimur leikjum Englands í keppninni, en Hodgson er þó sagður hafa trú á sínum manni.

Wayne Rooney, fyrirliði Englands, hrósaði Sterling í hástert í samtali við blaðamenn í gær og sagði að hann væri enska liðinu mikilvægur. Þá léti hann gagnrýni lítið á sig fá.

„Hann hefur verið frábær á æfingasvæðinu. Það velkist enginn í vafa um að hann hefur gott hugarfar. Hann er frábær liðsmaður og leikmaður sem getur breytt leikjum á svipstundu.“