Mikil gleði braust út í herbúðum velska landsliðsins eftir sigur Íslands gegn Englandi í kvöld. Lið Wales er sem kunnugt er einnig komið í 8-liða úrslit keppninnar og hefur árangur þeirra, ekki síður en Íslands, vakið talsverða athygli í keppninni.

Það var augljóst hvaða lið leikmenn Wales studdu þar sem þeir voru komnir saman á hóteli sínu í Frakklandi til að horfa á leikinn. Þegar flautað var til leiksloka braust út mikill fögnuður innan leikmannahópsins eins og meðfylgjandi myndband ber með sér.

Sigur Íslands þýðir að landslið Wales er komið lengra en enska landsliðið og það er eitthvað sem leikmenn Wales gætu eflaust vanist.