Stærstu stundirnar fyrir Íslendinga á EM í Frakklandi
Birkir Bjarnason kemur Íslandi á EM-kortið og jafnar metin gegn Portúgal, í fyrsta leik liðsins á EM. Glæsilegur undirbúningur og sending frá Jóhanni Berg Guðmundssyni. Portúgalar, sem verið höfðu mikið betri í leiknum, vissu ekki hvaðan á þá stóð veðrið.
Íslendingar standa á öndinni þegar Cristiano Ronaldo býr sig undir að taka aukaspyrnu þegar leiktíminn er runninn út í St. Etienne. Spyrnan fer í hönd íslensks leikmanns. Ronaldo fær aðra spyrnu, miklu nær. Sem betur fer sparkar hann boltanum aftur í vegginn og dómarinn flautar af. Fyrsta stig Íslands á stórmóti staðreynd.
Ummæli Ronaldos um að Íslendingar hefðu lélegt hugarfar og færu þess vegna ekki langt í mótinu gera að verkum að heimsbyggðin – svo að segja – fylkir sér að baki Íslandi. Stuðningurinn nær langt út fyrir raðir þjóðarinnar og sá meðbyr hefur skilað sér í auknum stuðningi úr áhorfendastúkunni.
Gábor Király, markvörður Ungverja, missir boltann eftir hornspyrnu Íslands í leiknum í Marseille. Hann berst að lokum til Arons Einars Gunnarssonar, sem fellur eftir viðskipti við ungverskan varnarmann. Gylfi Þór skorar af miklu öryggi úr vítaspyrnu og kemur Íslandi yfir.
Áhorfendur standa á öndinni þegar Hannes Þór Halldórsson misreiknar sig í upphafi leiksins við Austurríki og Arnautovic stelur af honum boltanum fyrir framan autt markið. Heilladísirnar haga því þannig að Arnautovic rennur á grasinu og Hannes nær að pota boltanum á milli fóta framherjans.
Jón Daði Böðvarsson skorar laglegt mark, eftir innkast Arons Einars og skalla Kára Árnasonar, og kemur liðinu yfir.
Hurð skellur nærri hælum þegar Alexandar Dragovic skýtur boltanum í stöng úr víti sem Ari Freyr Skúlason fær dæmt á sig. Lukkan hliðholl Íslandi.
Dómarinn ákveður að dæma ekki víti þegar Ara Frey skrikar fótur í teignum og fellir með því sóknarmann Austurríkis.
Kári, besti maður vallarins, bjargar marki þegar hann ver markskot Austurríkismanna á marklínu, og heldur með því leiknum jöfnum.
Allt ætlar um koll að keyra þegar Arnór Ingvi Traustason skorar sigurmark með síðustu spyrnu leiksins við Austurríkismenn. Tvennt tryggir hann Íslendingum með markinu, auk sigursins; leik við Englendinga í 16-liða úrslitum og – ekki síður – fimm daga hvíld.