Velgengni íslenska karlalandsliðsins í knattspyrnu á EM í Frakklandi hefur ekki farið framhjá nokkrum manni og svo virðist vera sem margir vilja klæðast íslensku landsliðstreyjunni. Þetta er að minnsta kosti raunin hjá danska íþróttavörufyrirtækinu Unisport en þar er treyja íslenska liðsins ein sú mest selda.

Unisport er danskt fyrirtæki sem sérhæfir sig í sölu á varningi sem tengist knattspyrnu á einn eða annan hátt. Fyrirtækið rekur meðal annars stóra verslun í Kaupamannahöfn auk þess sem fyrirtækið er með netverslanir í Danmörku, Svíþjóð, Finnlandi, Frakklandi, Þýskalandi og Hollandi.

Í tilkynningu frá fyrirtækinu kemur fram að sala á treyjum íslenska liðsins hafi aukist um 1800 prósent frá því að mótið hófst. Er treyja íslenska liðsins nú sú sjötta vinsælasta í versluninni af treyjum þeirra tuttugu og fjögurra landa sem hófu keppni á EM í Frakklandi.

Treyja þýska liðsins er sú vinsælasta en í næstu sætum þar á eftir koma treyjur Frakklands, Tyrklands, Albaníu og Englands. Íslenska treyjan er sem fyrr segir í 6. sæti. Treyja sænska liðsins er í 7. sæti, ítalska liðsins í 8. sæti, spænska liðsins í 9. sæti og Portúgals í 10. sæti.

„Áður en mótið byrjaði bundum við nokkrar vonir við íslensku treyjuna en eftirspurnin hefur farið fram úr okkar björtustu vonum. Við hefðum getað selt fleiri treyjur en það hefur verið erfitt að nálgast þær,“ segir Filip Domagala, framkvæmdastjóri Unisport.

„Fólk hefur tilhneigingu, eðlilega, til að kaupa sér treyjur stóru þjóðanna, en flott hönnun hefur líka sitt að segja. Margir vilja treyjur sem þeir geta líka verið í við aðrar kringumstæður – til dæmis þegar þeir eru ekki á vellinum eða að horfa á leiki keppninnar heima,“ segir hann.

Tékkneska treyjan er sú óvinsælasta en þar á eftir koma treyjur Slóvakíu, Rússlands, Úkraínu og Rúmeníu.