Adebayo Akinfenwa, sem gengur undir viðurnefninu „Skepnan“ (e. The Beast) vegna líkamsburða sinna skoraði sigurmark Wimbledon í 2-0 sigri liðsins gegn Plymouth Argyle á mánudag. Um var að ræða úrslitaleik milli liðanna um sæti í League One, sem er ígildi þriðju deildar þar ytra.

Plymouth var talið sigurstranglegra liðið en Wimbledon-menn létu það sem vind um eyru þjóta og unnu sanngjarnan sigur. Lyle Taylor skoraði fyrra markið á 79. mínútu en síðari markið leit dagsins ljós í uppbótartíma. Dæmd var vítaspyrna á Plymouth og bjó vítaskytta liðsins, Callum Kennedy, sig undir að taka spyrnuna mikilvægu. Akinfenwa var hins vegar ekki á þeim buxunum og krafðist þess að fá að taka vítið.

Ástæðuna má rekja til þess að fyrir leikinn hafði honum verið tilkynnt að samningur hans yrði ekki framlengdur og því væri hann að spila sinn síðasta leik fyrir Wimbledon. Liðsfélagarnir hnakkrifust í aðdraganda spyrnunnar en sé mið tekið af líkamsbyggingu Akinfenwa þá tók Kennedy þá skynsamlegu ákvörðun að gefa eftir í baráttunni. „Skepnan“ steig því upp og skoraði örugglega. „Ég er tæknilega atvinnulaus í dag. Stjórar annarra liða mega endilega hafa samband á WhatsApp og útvega mér vinnu,“ sagði Akinfenwa kátur eftir leikinn.