Í fyrsta sinn mun spænska stórveldið Barcelona bjóða upp á æfingabúðir í samvinnu við Knattspyrnuakademíu Íslands. Æfingabúðirnar eru eingöngu ætlaðar stúlkum.

„Íslensk kvennaknattspyrna er kraftmikil og gæði hennar á heimsmælikvarða. Þess vegna horfir FCB nú til Íslands en atvinnumennska komst á með kvennaliði þeirra í fyrra og þar á bæ leggja menn nú mikla áherslu á kvennaboltann,“ segir í tilkynningu sem aðstendendur Knattspyrnuakademíunnar hafa sent frá sér.

„Það er sannarlega heiður að Barça, eitt öflugasta íþróttafélag heims, skuli velja Ísland til að bjóða eingöngu stúlkum, í fyrsta sinn, upp á æfingabúðir þar sem reyndir þjálfarar félagsins þjálfa þátttakendur eftir æfingakerfi þeirra og miðla um leið þekkingu sinni til íslenskra þjálfara.

Æfingabúðirnar verða á Valsvellinum dagana 8.-13. júlí. Þeim lýkur með hófi þar sem varaforseti FCB, Carles Vilarrubí i Carrió, mætir ásamt fleirum. Nánari upplýsingar um lokahófið verða veittar síðar.

Áður en langt um líður er svo stefnt að því að fá kvennalið FCB til Íslands í því skyni að spila vináttuleik við úrvalslið úr Pepsi deildinni.

Skráning er hafin í æfingabúðirnar sem ætlaðar eru stúlkum á aldrinum 10-16 ára. Reiknað er með að færri komist að en vilja og þess vegna eru forráðamenn hvattir til að skrá stúlkurnar sínar sem fyrst á

Allir þátttakendur munu fá til eignar Nike æfingagalla og fótbolta.