Eric er væntanlegur til Eyja í lok vikunnar
Knattspyrnuráð ÍBV hefur boðið markmanninum Eric Dhaira sem er bróðir Abel Dhaira, til landsins til þess að æfa og spila með 2. flokki félagsins og KFS sem leikur í þriðju deildinni. Þetta kemur fram í tilkynningu frá Eyjamönnum. En Abel sem lést úr krabbameini fyrr á árinu var markvörður ÍBV.
Í tilkynningu frá félaginu segir að Abel hafi komið að máli við stjórnina undir lok síðasta tímabils. Hann langaði að taka bróður sinn með sér þegar hann kæmi aftur til landsins frá Úganda. Það var Abel gríðarlega mikilvægt að að hann fengi að kynnast landi og þjóð.
„Eftir að Abel lést ákvað knattspyrnuráð ÍBV að bjóða Eric til landsins og dvelja hér út tímabilið. Eric hefur nýlega gert samning við félagsliðið Sona í Úganda og fengum við þá til þess að lána hann út tímabilið svo Eric fái að upplifa draum Abels. Eric sem á nokkra landsleiki með yngri landsliðum Úganda hefur nú fengið leikheimild með KFS og 2. flokki ÍBV. Eric er væntanlegur til Eyja í lok vikunnar,“ segir í tilkynningunni.
Þar segir jafnframt. „Við í knattspyrnuráði ÍBV erum mjög stoltir að ná að uppfylla þennan draum Abels heitins.“