„Nei, nei, nei. Þetta er búið,“ var það eina sem Louis van Gaal sagði við fréttamann Sky Sports fyrir utan hótelið sem Manchester United-liðið dvaldi á í nótt eftir sigurinn í ensku bikarkeppninni í gær.

Strax eftir leik greindi breska ríkisútvarpið, BBC, frá því að United hefði náð samkomulagi við José Mourinho um að taka við stjórn United-liðsins af Hollendingnum. Í frétt BBC kom fram að tilkynning væri væntanleg í vikunni.

Van Gaal vildi hins vegar ekki tjá sig um þetta þegar fréttamaður Sky Sports spurði hann um stöðu hans hjá félaginu. „Þetta er búið,“ sagði van Gaal og mætti túlka orð hans á þann veg að hann hafi stýrt United-liðinu í síðasta sinn.

Í frétt Sky Sports í morgun var greint frá því að samkomulag milli Mourinho og United væri ekki í höfn. Jorge Mendez, umboðsmaður Mourinho, er hins vegar sagður væntanlegur til Englands á þriðjudag þar sem viðræður munu fara fram og samningur hugsanlega undirritaður í kjölfarið.

Louis van Gaal skrifaði undir þriggja ára samning við United eftir HM í Brasilíu 2014 og stóð aldrei til að hann yrði lengur þjálfari liðsins en til ársins 2017. United hefur fjárfest í nýjum leikmönnum fyrir 250 milljónir punda síðan van Gaal tók við, en þrátt fyrir það hefur árangurinn látið á sér standa.

United-liðið endaði í 5. sæti ensku úrvalsdeildarinnar á dögunum og tekur liðið ekki þátt í Meistaradeild Evrópu á næstu leiktíð. United vann þó sinn fyrsta stóra bikar í gær síðan Sir Alex Ferguson hætti með liðið vorið 2013.