Jesse Lingard tryggði United tólfta bikartitilinn
Manchester United varð í dag bikarmeistari á Englandi eftir 2-1 sigur á Crystal Palace í úrslitaleiknum. Þetta var tólfti sigur United í bikarkeppninni og jafnaði félagið þar með Arsenal yfir flesta sigra í þessari elstu bikarkeppni í heimi.
Staðan í hálfleik var markalaus en Crystal Palace tók forystuna á 78. mínútu þegar Jason Puncheon skoraði. Rúmum tveimur mínútum síðar jafnaði Juan Mata eftir laglegan undirbúning Wayne Rooney. Staðan að loknum venjulegum leiktíma var 1-1 og því þurfti að grípa til framlengingar.
Chris Smalling fékk sitt annað gula spjald og lék United manni færra síðustu fimmtán mínúturnar. Það kom ekki að sök því Jesse Lingard skoraði glæsilegt sigurmark þegar 10 mínútur voru eftir. Lokatölur 2-1 fyrir United.