Bjarni Jóhannsson, þjálfari karlaliðs ÍBV í fótbolta, segir að erfitt geti verið fyrir félög á landsbyggðinni að fá liðsstyrk. Ástæðuna rekur hann meðal annars til þess að kærustur leikmanna stoppi þá af. Pepsi-deildin rúllar af stað eftir rúma viku og undirbýr Bjarni nú lið sitt af kappi.

Bjarni segir frá þessu í viðtali á Fótbolti.net.

Í viðtalinu segir Bjarni að það sé fylgifiskur þess að stýra liði á landsbyggðinni að erfitt geti reynst að fá leikmenn til að flytja út á land. Bjarni þekkir þetta af eigin raun, en áður en hann tók við ÍBV stýrði hann liði KA á Akureyri. Þegar Bjarni er spurður hvað það er sem helst stendur í vegi fyrir því að menn komi til Vestmannaeyja, segir hann:

„Það er fyrst og fremst samgönguvesenið. Annað, sem er ekki í Eyjum, en á mörgum öðrum stöðum úti á landi, er vesen fyrir þessa stráka að fá atvinnu fyrir sumarið,“ segir hann og bætir við:

„Það er líka einn þáttur í þessu sem er svolítið skemmtilega vondur. Það getur verið mjög slæmt að ræða við leikmann sem á kærustu. Oft eru það þær sem stoppa þetta algjörlega af. Þær hafa ekki kjarkinn og þær eru farnar að ráða alltof miklu þessar konur,“ sagði Bjarni og hló í viðtalinu.

Bjarni undirbýr lið sitt nú fyrir átökin í Pepsi-deildinni, en keppni hefst eftir rúma viku sem fyrr segir, eða þann 1. maí. Fótbolti.net spáir ÍBV 8. sætinu. Í viðtalinu segir Bjarni að hann eigi erfitt með að skilja hvers vegna leikmenn taki ekki skrefið og fari til félaga á landsbyggðinni.

„Ég var áður á Akureyri í þrjú ár og þetta er mikill bardagi. Menn eru ekki til í að koma og taka skrefið. Það er skrýtið af því að í gegnum árin hafa menn blómstrað í Eyjum og farið síðan erlendis og klúbba uppi á landi. Ef menn hafa kjark og trú á sjálfum sér þá er þetta fínn staður til að fá sénsinn,“ segir Bjarni en viðtalið á Fótbolti.net má sjá í heild sinni hér.