Svona græðir og eyðir kylfingurinn auðæfum sínum –
Kylfingurinn Tiger Woods má muna sinn fífil fegurri á golfvellinum. Það eru ár og dagar síðan hann einokaði golfíþróttina og var sá langbesti í sínu fagi. Tiger virðist aldrei hafa náð sér almennilega á strik eftir að hneykslismál skóku einkalíf hans og tilveru árið 2009, sem lyktaði með því að hann skildi við eiginkonu sína Elin Nordegren. Meiðsli hafa einnig leikið kappann grátt á undanförnum árum og er alls óvíst hvenær hann snýr aftur eftir aðgerð á baki sem hann fór í á síðasta ári. En Tiger er þó ekki á flæðiskeri staddur fjárhagslega og var enn 9. tekjuhæsti íþróttamaður heims samkvæmt nýjasta tekjulista tímaritsins Forbes, með árstekjur upp á rúmar 50 milljónir dala, eða 6,4 milljarða króna.
Vefsíða Business Insider tók til gamans saman lista yfir það hvernig Tiger, sem stendur nú á fertugu, þénar og eyðir auðæfum sínum og hefur gert á umliðnum árum.
Tiger Woods var um árabil draumaskjólstæðingur stórfyrirtækja sem reiðubúin voru til að greiða honum stórfé fyrir auglýsingasamninga. Heildartekjur Tigers á ferlinum, frá því hann gerðist atvinnumaður árið 1996, nema rúmlega 1,35 milljörðum Bandaríkjadala, eða sem nemur ríflega 173 milljörðum íslenskra króna. Eins og hjá öðrum stórstjörnum kemur minnstur hluti tekna hans frá íþróttinni sem hann stundar. Af þeim 50,6 milljónum dala sem hann hafði í tekjur árið 2015 þá voru 50 milljónir dala frá styrktaraðilum á borð við Nike, Rolex og Upper Deck. Ekki slæmt fyrir kylfing sem vart hefur unnið mót í þrjú ár.
Af heildartekjum Tigers í gegnum tíðina þá virðist það vinningsfé sem hann hefur hlotið fyrir að vinna á annað hundrað atvinnumannamót, þar af 14 risamót, aðeins dropi í hafið í samanburði. Tiger hefur þó tekið heim 110 milljónir dala frá golfvellinum á ferlinum, eða sem nemur 14 milljörðum króna og myndu flestir sætta sig við þá innkomu.
Árið 2013 var greint frá því að Nike hefði endurnýjað langtímasamning sinn við Tiger og er hann sagður metinn á um 200 milljónir dala, eða 25 milljarða króna. Nike hefur í gegnum tíðina verið ein helsta tekjulind Tigers og samstarf þeirra reynst ábatasamt fyrir báða aðila frá upphafi.
Það dró til tíðinda þegar Tiger klessukeyrði bifreið sína við heimili sitt í nóvember 2009, að því er talið er eftir heiftarlegt rifrildi við eiginkonu sína. Næstu vikur og mánuði kom ýmislegt misjafnt upp á yfirborðið og afhjúpaði að stórstjarnan hefði lifað tvöföldu lífi um árabil. Og átt margar hjákonur.
Tugir kvenna stigu fram í fjölmiðlum og lýstu því yfir að hafa átt í ástarsambandi við Tiger. Fullkomið orðspor hans beið verulega hnekki, styrktaraðilar létu sig hverfa sem og eiginkona hans, Elin Nordegren. Skilnaður þeirra árið 2010 er sagður hafa kostað Tiger 110 milljónir dala, eða sem nemur öllu því vinningsfé sem hann hefur sankað að sér á ferlinum.
Árið 2004 ákvað Tiger að gera vel við sig og keypti sér lúxussnekkjuna Privacy á 20 milljónir dala, eða 2,5 milljarða króna. Þar er allt til alls, meðal annars átta manna nuddpottur og líkamsræktarsalur – svo aðeins fátt eitt sé nefnt.
Árið 2006 keyptu Tiger og Elin sér fokdýra landareign á Jupiter Island á Flórída og byggðu sér lúxusstórhýsi frá grunni fyrir um 55 milljónir dala, eða 7 milljarða króna. Á landareigninni er meðal annars að finna golfvöll og einkabryggju þar sem Tiger getur fengið sér rúnt á snekkjunni sinni. Eftir skilnað þeirra hjóna hefur Tiger búið í húsinu.
Þegar Tiger Woods tekur þátt í golfmótum þá leigir hann gjarnan hús meðan á þeim stendur. Tiger vill hins vegar hafa kunnuglega hluti í kringum sig og skiptir því út öllum húsgögnunum í þeim fyrir sín eigin.
Auðkýfingar eins og Tiger ferðast ekki með hefðbundnu áætlunarflugi og dugar því ekkert minna en glæsileg Gulfstream G550 einkaþota fyrir allt hans snatt milli staða og heimshluta. Þessi einkaþota hans er metin á 65 milljónir dala, eða 8,3 milljarða króna.
Tiger lætur líka gott af sér leiða. Árið 2011 lagði hann 11 milljónir dala, eða 1,4 milljarða króna, í góðgerðasjóð sinn, Tiger Woods Foundation. Sjóðinn stofnaði hann árið 1996 ásamt föður sínum Earl.
