Skráning í KIA Gullhringinn gengur vonum framar
Skráning fyrir KIA Gullhringinn, hjólreiðamót sem haldið verður í sumar, hófst síðastliðinn laugardag. Skráningin hefur gengið vel og virðist fólk vera orðið spennt fyrir komandi hjólasumri. Á fyrsta sólahringnum hafði tæplega helmingur þeirra sem kepptu í fyrra skráð til aftur til leiks. Aldrei hafa fleiri skráð sig svona snemma í keppnina líkt og í ár.
KIA Gullhringurinn verður haldinn á Laugarvatni þann 9. júlí næstkomandi en keppnin hefur verið haldin í uppsveitum Árnessýslu frá árinu 2012, það árið lögðu um hundrað þáttakendur af stað. Mikið vatn hefur runnið til sjávar síðan og í fyrra lögðu af stað um sjöhundruð manns frá Laugarvatni.
Ljóst er að það stefnir í enn eitt þátttökumetið. Ákveðið hefur verið af öryggisástæðum og á forsendum gæða keppninnar að hámarksfjöldi þátttakenda í ár verði 800 manns, úr öllum þremur vegalengdunum sem boðið er uppá. Hægt er að skrá sig til leiks og fylgjast með hverjir hafa skráð sig á www.kiagullhringurinn.is.
Sigursælasta hjólreiðakona landsins, María Ögn Guðmundsdóttir, hefur tekið að sé framkvæmdastjórn keppninnar. Hún er ekki nýliði þegar kemur að skipulagningu reiðhjólamóta, en María var framkvæmdastjóri WOW Cyclathon árið 2014, sem og hún hefur staðið fyrir ýmsum viðburðum tengdum reiðhjólum í gegnum tíðina.
Að sögn Maríu hefur mótið verið til fyrirmyndar undanfarin ár og að öryggismál hafi verið metnaðarmál. Ekkert verður slakað á í þeim efnum í ár, heldur aðeins bætt í og má þar nefna fjöldatakmörkunina sem sett hefur verið.
Bílaumboðið Askja hefur kostað keppnina síðastliðin þrjú ár og hefur það verið framlengt. Jón Trausti Ólafsson, framkvæmdastjóri Öskju segir að mikill fengur sé að fá Maríu Ögn sem framkvæmdastjóra keppninnar.
Undanfarin ár hefur María verið iðin við að deila reynslu sinni til að auka vægi hjólreiðaíþróttarinnar til almennings og hefur boðið upp á regluleg námskeið undir merkjum Hjólaþjálfunarinar og stefnir hún ótrauð á að bjóða uppá námskeið og þjálfun.