Denver Broncos vann glæsilegan sigur á Carolna Panthers í fimmtugasta Super Bowl-leiknum sem fram fór í Kaliforníu í nótt. Lokatölur urðu 24-10 og er óhætt að segja að glæsilegur varnarleikur Denver hafi lagt grunninn að mögnuðum sigri. Þetta var þriðji sigur Denver í NFL en liðið vann tvo titla árin 1997 og 1998.

Peyton Manning, einn besti leikstjórnandi sögunnar í NFL, lék væntanlega sinn síðasta leik í gær en Manning er orðinn 39 ára gamall. Sem fyrr segir var vörn Denver frábær og lokaði hún nokkrum sinnum á Cam Newton, leikstjórnanda Carolina , sem var valinn besti leikmaður NFL-deildarinnar í vetur. Von Miller var valinn mikilvægasti leikmaður úrslitaleiksins í nótt, en hann náði til að mynda tveimur boltum af Newton í nótt.