Luca di Montezemelo, fyrrverandi stjórnandi Michaels Schumacher hjá Ferrari, ýjar að því að bakslag hafi komið í bataferli ökuþórsins sem slasaðist alvarlega í skíðaslysi þann 29. desember 2013.

Montezemelo sagð við fréttamenn í dag að hann hefði frétt af Schumacher en fór ekki nánar út í það hvers eðlils þær fréttir voru. „Ég athuga stöðu hans reglulega og því miður eru ekki góðar fréttir af honum,“ sagði Montezemelo.

Að sögn breska ríkisútvarpsins, BBC, hefur talsmaður Schumachers neitað að svara fyrir ummælin sem Montezemelo lét falla. Lítið hefur frést af Schumacher undanfarna mánuði að öðru leyti en því að hann gangi í gegnum erfitt bataferli.

Schumacher var í dái í sex mánuði eftir slysið sem varð í frönsku Ölpunum. Hann var í kjölfarið fluttur á sjúkrahús nærri Lausanne í Sviss en undanfarin misseri hefur hann verið heima hjá sér, eða síðan í september 2014.