Landsliðsmaðurinn Eiður Smári Guðjohnsen er orðinn leikmaður Molde í norsku úrvalsdeildinni í knattspyrnu. Eiður, sem er einn allra besti knattspyrnumaður Íslands frá upphafi, skrifaði undir samning hjá félaginu í morgun.

Frá þessu er greint á vefnum Fotbolti.net. Þar segir að samningur Eiðs við Molde nái yfir komandi tímabil í norsku úrvalsdeildinni, sem hefst eftir mánuð.

Fram kemur að Eiður hafi staðist læknisskoðun hjá félaginu í morgun og að hann hafi farið á sína fyrstu æfingu með Molde í kjölfarið.

„Minn metnaður er að spila eins vel og ég get og hjálpa liðinu eins og ég get. Vonandi getum við barist um meistaratitilinn,“ sagði Eiður á leið á sína fyrstu æfingu með Molde.

Þjálfari liðsins er Ole Gunnar Solskjær, fyrrum framherji Manchester United. Molde hefur þrisvar sinnum orðið norskur meistari, síðast árið 2014. Á síðasta tímabili endaði liðið í 7. sæti í deildinni.

Eiður verður 37 ára gamall á þessu ári og stefnir á að vera í landsliðshópnum sem fer til Frakklands í sumar til að taka þátt í lokamóti Evrópumótsins í knattspyrnu.

Eiður lék síðast fyrir Shijiazhuang Ever Bright í Kína og áður hefur hann leikið með liðum á borð við Barcelona, Chelsea og Val.