Leikmenn Borussia Dortmund hafa verið í miklum ham undanfarnar vikur og í vikunni settu þeir býsna merkilegt met.
Dortmund gerði sem kunnugt er 2-2 jafntefli gegn Real Madrid í lokaleik riðlakeppninnar í Meistaradeild Evrópu á miðvikudag og tryggði þýska liðið sér þar með toppsæti riðilsins. Með mörkunum tveimur í Madrid setti Dortmund met yfir flest mörk skoruð í riðlakeppni Meistaradeildarinnar.
Dortmund skoraði 21 mark en fyrra metið var 20 mörk sem stórliðin Manchester United (1998-1999), Barcelona (2011-2012, 2016-2017) og Real Madrid (2012-2014) settu á sínum tíma.
Flest mörk Dortmund í riðlakeppninni komu gegn Legia Varsjá, eða fjórtán talsins. Þeir unnu fyrri leik liðanna 6-0 á útivelli og seinni leikinn á heimavelli 8-4. Ljóst er að Dortmund verður enginn óskamótherji þegar dregið verður í 16-liða úrslit keppninnar á morgun.