Mat lagt á möguleika toppliðanna í Englandi eftir fyrstu átta umferðirnar
Þó að aðeins átta umferðir séu búnar í ensku úrvalsdeildinni er farið að skýrast hvaða lið verða í titilbaráttunni og hvaða lið munu berjast í neðri hlutanum. Breska blaðið Daily Mail lagði í vikunni mat á möguleika toppliðanna á að hampa meistaratitlinum í vor miðað við frammistöðuna í byrjun tímabils. Öllum liðum í efstu sjö sætunum var gefin einkunn á skalanum 1–10. Þau lið sem skora hæst þykja líklegust til að landa titlinum í vor.
City er á toppi deildarinnar á markatölu og það lið sem flestir spá að vinni deildina. Eftir frábæra byrjun hefur aðeins hallað undan fæti hjá Guardiola og lærisveinum hans. Lykilmenn hafa verið heilir heilsu og þó svo að helsta stjarna liðsins, Sergio Aguero, hafi afplánað þriggja leikja bann tókst City að vinna alla leikina í fjarveru hans. Það segir ýmislegt um breidd City. Tapið gegn Tottenham á dögunum og jafnteflið gegn Everton sýnir þó að City er langt því frá ósigrandi.
Einkunn: 8/10
Arsenal hefur farið vel af stað og er með jafn mörg stig og City í toppsætinu. Tólf ár eru síðan Arsenal vann síðast deildina og af þeim sökum hafa margir afskrifað lærisveina Wengers. Margir eru þó á því að Arsenal-liðið í dag sé það best skipaða í áraraðir. Ef lykilmenn haldast heilir er ljóst að Arsenal er til alls líklegt. Þá er þess loks getið að á síðustu sjö mánuðum hefur Arsenal aðeins tapað einum leik í deild.
Einkunn: 7/10
Tottenham var nálægt því að landa titlinum í fyrra og mæta leikmenn reynslunni ríkari til leiks í haust. Tottenham er eina liðið í efstu þremur deildum Englands sem ekki hefur enn tapað leik. Leikmenn sem ekki voru í lykilhlutverkum í fyrra hafa stigið upp og spilað vel. Má þar nefna Son Heung Min sem hefur verið frábær í haust og þá hafa nýir leikmenn eins og Victor Wanyama og Moussa Sissoko spilað vel.
Einkunn: 7/10
Liverpool hefur líklega spilað flottasta fótboltann í haust ásamt Manchester City. Jurgen Klopp er að búa til spennandi lið á Anfield og ljóst er að liðið getur unnið öll lið deildarinnar. Liverpool hefur þó lent í vandræðum gegn liðum sem spila þéttan varnarleik. Þetta sást í tapinu gegn Burnley í byrjun tímabils og í markalausa jafnteflinu gegn Manchester United á dögunum. Sóknarleikur Liverpool er eins og hann gerist bestur en varnarleikurinn hefur verið höfuðverkur á köflum. Liverpool hélt í fyrsta sinn hreinu í deild á tímabilinu í leiknum gegn United á mánudag.
Einkunn: 6,5/10
Gengi Chelsea í byrjun tímabils hefur verið upp og niður. Liðið hefur á köflum spilað vel en síðan hafa komið mjög daprir leikir inni á milli. Chelsea getur einbeitt sér að deildinni enda enginn Evrópufótbolti á Stamford Bridge í vetur. Mörgum spurningum er þó ósvarað með Chelsea-liðið. Stjórinn, Antonio Conte, veit hvað þarf til að vinna titla en stóra spurningin er hvort hann muni ráða við það verkefni strax.
Einkunn: 5,5
Everton hefur komið nokkuð á óvart í haust og varð um liðna helgi fyrsta liðið til að taka með sér stig af Etihad, heimavelli Manchester City. Everton er þó án sigurs í síðustu fjórum leikjum og líklega er leikmannahópurinn ekki nógu stór eða öflugur til að halda liðinu í toppbaráttu í vetur. Ef Romelu Lukaku helst heill og heldur áfram að raða inn mörkum gæti Everton vel blandað sér í baráttuna um Meistaradeildarsæti.
Einkunn: 4,5
United-liðið undir stjórn José Mourinho hefur farið rólega af stað. Félagið eyddi 150 milljónum punda í nýja leikmenn en nýju mennirnir hafa ekki beinlínis farið af stað með látum. Eric Bailly, miðvörðurinn öflugi, hefur þó spilað vel á meðan Zlatan Ibrahimovic hefur skilað nokkrum mörkum. Á meðan hafa til dæmis Paul Pogba og Henrikh Mkhitaryan ekki náð að sýna sitt rétta andlit og þá hefur fyrirliðinn, Wayne Rooney, verið fjarri sínu besta. Enginn efast þó um gæði leikmannahópsins og stjórans sem hefur séð þetta allt áður. United gæti allt eins farið á flug og gert harða atlögu að titlinum. United þarf þó að fara að byrja tímabilið.
Einkunn: 6/10