Handboltaþjálfarinn Karl Erlingsson, sem hætti hjá kvennaliði Gróttu eftir að hafa verið dæmdur í bann fyrir gróf ummæli um dómara, heldur áfram að gagnrýna HSÍ. Í orðsendingu sem hann birti á Facebook-vegg Einars Þorvarðarsonar, framkvæmdastjóra HSÍ, í nótt, vandar hann honum ekki kveðjurnar.

Mbl.is greindi fyrst frá.

Tilefnið er eins leiks bann sem Einar Jónsson, þjálfari Stjörnunnar, fékk eftir ummæli sín í fjölmiðlum. Hann krafðist þess að dómarar bæðust afsökunar á dómgæslu í leik Stjörnunnar og Aftureldingar, þar sem hann taldi halla á lið sitt.

Sjá einnig: „Skrollaðu þessu á íþróttasíðuna hjá þessu fávita fasistablaði þínu“

„Hvaða djók er þetta? Er einhver mælikvarði í lögum HSÍ hvað óviðeigandi ummæli þýða?“ spyr hann áður en hann biður Einar Þorvarðarson afsökunar á meðan hann æli. Því næst segir hann að Einar Jónsson hafi lengi haft Aftureldingu á heilanum. „Þessi eins leiks dómur er algjör helvítis brandari!“ Hann óskari Einari Jónssyni til hamingju með dóminn. „Þetta toppar alla hneisu sem HSÍ hefur afrekað til þessa og er þó af nógu að taka.“

Reiði Skilaboð Karls til Einars Þorvarðarsonar.

Í lok færslunnar hótar hann Einari Þorvarðarsyni málaferlum. „Gef mér frest til að skoða með mínum lögmönnum fyrir hvaða dómstól þú verður dreginn sem forsvarsmaður þessara samtaka.“

Karl var á dögunum látinn fara sem aðstoðarþjálfari kvennaliðs Gróttu eftir að hafa meðal annars kallað dómara vangefna. Þá lét hann blaðamann Morgunblaðsins heyra það og kallaði hann meðal annars fávita.

Undir færslunni er látið að því liggja að Karl hafi sett innleggið inn undir áhrifum áfengis. Karl lætur spurningu þess efnis hvort flaskan fari ekki að tæmast sér í léttu rúmi liggja. „Nei, hún tæmist aldrei :)“