Breska blaðið Mirror tekur saman lista yfir 50 bestu leikmenn ensku úrvalsdeildarinnar
Gylfi Þór Sigurðsson er í hópi bestu leikmanna ensku úrvalsdeildarinnar, að mati breska blaðsins Mirror. Raunar telur blaðið Gylfa í hópi 50 bestu leikmanna deildarinnar og er hann ofar á listanum en margar af skærustu stjörnum deildarinnar.
Gylfi, sem leikur með Swansea, hefur verið að gera það gott á Englandi og með íslenska landsliðinu á undanförnum árum. Hann er markahæsti leikmaður Swansea í ensku úrvalsdeildinni frá upphafi og er, að öðrum ólöstuðum, þeirra besti leikmaður.
Mirror stendur þessa dagana fyrir valinu á 50 bestu leikmönnum ensku úrvalsdeildarinnar. Í dag voru leikmenn í sætum 41 til 50 kynntir til sögunnar og er skemmst frá því að segja að Gylfi er þar í 41. sætinu. Fyrir neðan hann á listanum eru leikmenn eins og Wayne Rooney, Aaron Ramsey, Anthony Martial og Ross Barkley.
„Íslenski miðjumaðurinn skorar eða leggur upp mark í þriðjungi leikja sinna í úrvalsdeildinni. Þó að Svanirnir hafi verið í basli efast enginn um gæði Gylfa sem hefur svo oft gert gæfumuninn,“ segir í umsögn Mirror.
Tekið er fram að þó að augu margra á þessari leiktíð hafi beinst að liðsfélaga hans, Hollendingnum Leroy Fer, sé Gylfi besti leikmaður liðsins. Þá komi það Gylfa og Swansea að gagni að hann er fjölhæfur leikmaður sem nýtist jafnt á miðjunni eða á vinstri vængnum þar sem hann á auðveldara með að koma sér í skotfæri.