Búin að vinna sér inn þátttökurétt á Mr. Olympia
Margrét Edda Gnarr sigraði á IFBB Legends Pro Classic-atvinnumannamótinu sem haldið var í Las Vegas í nótt. Þar með vann hún sér inn þátttökurétt á Olympia sem er endastöðin hjá atvinnumönnum í líkamsrækt, að því er segir á vefnum fitness.is
„Margrét Edda Gnarr er eini íslenski atvinnumaðurinn hjá IFBB og er með þessum stórkostlega árangri vægast sagt komin út í djúpu laugina. Allir keppendur, hvort sem það er hjá áhugamanna- eða atvinnumannadeildinni eiga sér þann draum að fá að keppa einn daginn á Olympia. Ofar verður ekki komist í keppnisheiminum, segir á fitness.is.
Margrét var í viðtali við DV í síðustu viku þar sem hún tjáði sig meðal annars um mótið. „Þetta er fyrsta atvinnumót ársins og hlakka ég mikið til að stíga á svið eftir árs pásu frá keppnum vegna veikinda sem ég var að kljást við,“ sagði Margrét. Þegar hún var spurð hver hennar helstu markmið væru í íþróttinni sagði hún:
„Fyrsta markmið var að vinna mót á Íslandi, seinna markmið var að vinna stórmót og gerast atvinnumaður, þriðja markmið var að fá boð á Arnold Classic og næstu markmið eru að vinna atvinnumót og í kjölfarið fá réttindi til að keppa á Mr. Olympia.“
Það má því segja að Margrét hafi nú náð öllum sínum markmiðum.