Bandaríska liðið skoraði sigurmarkið á lokamínútu leiksins
Íslenska karlalandsliðið í knattspyrnu tapaði gegn bandaríska landsliðinu 2-3 í vináttulandsleik í Carson í Kaliforníu. Ísland komst yfir á 13.mínútu leiksins þegar Kristinn Steindórsson skoraði gott mark. Jozy Altidore jafnaði metin sjö mínútum síðar og staðan var jöfn í hálfleik.
Aron Sigurðsson kom Íslendingum yfir með glæsilegu marki á 48.mínútu. Aron var að þreyta frumraun sína fyrir íslenska landsliðið og stóð sig afar vel. Bandaríkjamenn jöfnuðu leikinn á 59.mínútu þegar Michael Orozco skallaði boltann í netið af stuttu færi.
Íslendingar fengu fín færi til þess að skora fleiri mörk og voru síst lakari aðilinn í leiknum. Það var því afar súrt í broti þegar Steve Birnbaum stangaði boltann í netið eftir fast leikatriði á síðustu mínútu leiksins. 3-2 sigur Bandaríkjanna staðreynd.