Íslenska handboltalandsliðið féll í gærkvöldi úr leik á Evrópumótinu eftir tap gegn Króatíu í lokaleik riðlakeppninnar. Þar með er ljóst að möguleikar Íslands á að komast á Ólympíuleikanna í Brasilíu í sumar eru að engu orðnir og þá gæti farið svo að íslenska liðið verði í neðri styrkleikaflokki þegar dregið verður í umspil fyrir HM á næsta ári. Það þýðir að mjög sterkir andstæðingar gætu beðið íslenska liðsins.

Eftir leikinn í gærkvöldi vildi Aron Kristjánsson landsliðsþjálfari ekkert segja um framtíð sína með landsliðið, en samningur hans við HSÍ rennur út í sumar. „Nú borgar sig bara að koma sér út úr þessu húsi og heim, aðeins að kæla sig niður áður en maður segir nokkuð,“ sagði Aron í viðtali við RÚV eftir leikinn.

Í umræðum í HM-stofunni eftir leik sagði Logi Geirsson að um væri að ræða „taktískan ósigur hjá þjálfurunum“ og tók Bjarki Sigurðsson, sem einnig lék lengi með íslenska landsliðinu, undir orð Loga. „Þjálfarateymið, það er ekki að fúnkera. Það er ekki að vinna saman, það er ekki að leita lausna“

Í ljósi þess að íslenska liðið er nú fallið úr leik spyrjum við lesendur: Er kominn tími á nýjan landsliðsþjálfara? Taktu þátt í könnuninni hér til hliðar.