Ísland vann sigur í fyrsta leik sínum á Evrópumótinu í handknattleik sem var að ljúka. Íslendingar unnu Norðmenn með eins marks mun, 26-25 í gríðarlega dramatískum leik.

Guðjón Valur Sigurðsson fyrirliði skoraði sigurmarkið tíu sekúndum fyrir leikslok en hetja leiksins var Björgvin Páll Gústavsson sem varði skot Norðmanna á síðustu sekúndum leiksins og tryggði íslenska liðinu sigur.

Leikurinn var í járnum allan tíman og leiddu Norðmenn hann með einu marki í hálfleik, 11-10. Íslenska liðið náði forystu um miðbik seinni hálfleiks og leiddu með tveimur til þremur mörkum þar til undir lokin þegar Norðmenn náðu að jafna. Strákarnir héldu haus og náðu að landa gríðarlega mikilvægum sigri.

Aron Pálmarsson var gjörsamlega stórkostlegur í leiknum og skoraði 8 mörk í öllum regnbogans litum.

Aron dró vagninn í sóknarleik íslenska liðsins og sýndi að hann er einna besti, ef ekki besti, handknattleiksmaður í heiminum í dag. Þá átti Guðmundur Hólmar Helgason, yngsti leikmaður liðsins, sannkallaðan stjörnuleik í vörn íslenska liðsins.

Frábær byrjun íslenska liðsins í mótinu og gríðarlega mikilvæg stig í hús.