Sverre fagnar aukinni breidd – Vonbrigðin í fyrra geta hjálpað
„Ég held að menn vilji ekki upplifa annað svona mót.“
„Þetta er nýtt fyrir mér og svolítið skrýtið,“ segir þjálfari handknattleiksliðsins Akureyrar, Sverre Andreas Jakobsson, í samtali við DV. Sverre, sem stýrt hefur varnarleik íslenska landsliðsins í handknattleik um árabil er nú hættur að leika með landsliðinu og farinn að einbeita sér að þjálfun. Hann segist hafa nóg fyrir stafni þó að hann sé ekki á leiðinni á stórmót en blaðamaður greinir ákveðinn söknuð í röddinni. „Ætli þetta venjist ekki bara.“
Sverre er bjartsýnn fyrir hönd Íslands fyrir Evrópumótið í handbolta. Íslendingar hefja leik á föstudag, þegar þeir mæta Noregi en Hvít-Rússar og Króatar eru einnig í riðli með Íslendingum. Sverre segir jákvætt að sjá þann stíganda sem verið hefur í leik liðsins í undirbúningsleikjunum við Portúgali og Þjóðverja. Þá sé fagnaðarefni hvað Aron hafi gefið mörgum leikmönnum tækifæri. Það sé ný nálgun þegar kemur að landsliðinu, enda hefur í gegnum tíðina skort breidd í íslenska hópinn. „Leikmaður eins og Rúnar [Kárason] fær sínar mínútur og nýtir þær virkilega vel,“ segir hann. Áður hefði hann kannski setið meira á bekknum en hann hafi verið flottur í síðari leiknum á móti Portúgal og einnig í seinni leiknum gegn Þjóðverjum. Sömu sögu megi segja um Guðmund Hólmar Helgason, sem hafi nýtt þær mínútur sem hann hafi fengið á vellinum afar vel. Þetta séu jákvæð teikn.
Sverre líst vel á þá leikmenn sem eiga að fylla hans skarð í vörninni. Hann gerir ráð fyrir því að Aron muni freista þess að nota Bjarka Má Gunnarsson og Vigni Svavarsson sem aðalmenn í miðri vörninni. Þeir hafi mesta reynslu. En að Guðmundur Hólmar eða Tandri Már Konráðsson komi inn til vara. „Þetta getur svo gjörbreyst ef Bjarki verður ekki heill,“ segir hann en Bjarki hefur glímt við meiðsli í baki. „Þá tekur hann þá kannski alla með.“
Ísland hafnaði í 11. sæti á HM í Katar í fyrra. Ísland náði sér ekki á strik á mótinu og byrjaði marga leikina mjög illa. Sverre bendir á að lið eigi stundum slæm mót á nokkurra ára fresti. Það geti alltaf gerst. Hann segir mögulegt að mótið sitji eitthvað í mönnum en að menn noti það til hvatningar. „Ég held að menn vilji ekki upplifa annað svona mót. Svo horfa menn að sjálfsögðu á Ólympíuleikana,“ segir hann en eldri leikmenn liðsins eiga líklega ekki kost á nema einum Ólympíuleikum í viðbót. Það sé mönnum mikið keppikefli að komast þangað. Sverre bindur vonir við að vonbrigði síðasta stórmóts séu að baki þar sem liðinu hafi gengið mjög vel síðasta sumar, þegar það tryggði sér sæti á Evrópumótinu eftir að hafa glímt við sterka andstæðinga. „Við fengum þar nýjan núllpunkt.“
Sverre segir að Íslendingar þekki Norðmenn inn og út. Þeir hafi lengi viljað vinna okkur á stórmóti en hann telur að sú verði ekki raunin nú. Hvít-Rússar séu sýnd veiði en ekki gefin. Þá hafi orðið ákveðnar mannabreytingar á króatíska hópnum, en Króatar töpuðu óvænt með 15 marka mun fyrir Slóvenum á sunnudag. „Kannski þurfa þeir smá tíma til að ná fyrri styrk.“ Á heildina litið er Sverre bjartsýnn fyrir mótið og telur að Ísland tryggi sér sæti á næstu Ólympíuleikum. „Við förum ansi langt og ég hef mikla trú á strákunum,“ segir þessi geðþekki varnarmaður að lokum.
